راولپنڈی: 10 سالہ گھریلو ملازم بچے پر تشدد، ویڈیو وائرل ہونے پر ملزم گرفتار

راولپنڈی: صادق آباد کے علاقے میں 10 سالہ گھریلو ملازم بچے پر مبینہ تشدد کی ویڈیو سامنے آنے کے بعد سٹی پولیس آفیسر (سی پی او) حسن مشتاق سکھیرا نے واقعے کا فوری نوٹس لیتے ہوئے بچے کو ریسکیو کرنے اور ملزم کی فوری گرفتاری کے احکامات جاری کر دیے۔

پولیس کے مطابق صادق آباد پولیس نے فوری کارروائی کرتے ہوئے 10 سالہ گھریلو ملازم بچے کو بحفاظت بازیاب کرا لیا، جبکہ تشدد میں ملوث ملزم کو گرفتار کر لیا گیا ہے۔

ابتدائی تحقیقات کے مطابق متاثرہ بچہ ضلع اوکاڑہ کا رہائشی ہے اور گزشتہ تین ماہ سے ملزم کے گھر میں گھریلو ملازم کے طور پر کام کر رہا تھا۔

پولیس کا کہنا ہے کہ واقعے کا مقدمہ تھانہ صادق آباد میں درج کیا جا رہا ہے، جبکہ ملزم سے مزید تفتیش جاری ہے تاکہ واقعے کے تمام پہلوؤں کو سامنے لایا جا سکے۔

سی پی او راولپنڈی حسن مشتاق سکھیرا نے کہا ہے کہ بچوں اور خواتین پر تشدد کسی صورت برداشت نہیں کیا جائے گا اور قانون کی خلاف ورزی کرنے والوں کے خلاف سخت کارروائی عمل میں لائی جائے گی۔