کراچی: ڈارک ویب سے منسلک مبینہ آن لائن نیٹ ورک سے 13 سالہ بچی بازیاب،

کراچی: بین الاقوامی خفیہ ایجنسی کی اطلاع پر نیشنل سائبر کرائم انویسٹی گیشن ایجنسی (NCCIA) کراچی نے کارروائی کرتے ہوئے مبینہ خطرناک آن لائن نیٹ ورک کے شکنجے میں پھنسی 13 سالہ بچی کو بحفاظت بازیاب کرا لیا۔

این سی سی آئی اے حکام کے مطابق بچی کو مبینہ طور پر ڈارک ویب سے منسلک ایک گروہ کی جانب سے مختلف ٹاسک دیے جا رہے تھے۔ حکام کا کہنا ہے کہ پہلے ٹاسک میں بچی کو بلی کو زہر دے کر مارنے کا کہا گیا، جبکہ دوسرے ٹاسک میں اسے خود کو شدید نقصان پہنچانے کی ہدایت دی گئی۔

حکام کے مطابق ٹاسک پر عمل درآمد سے پہلے ہی این سی سی آئی اے کی ٹیم بچی تک پہنچ گئی اور اسے ممکنہ نقصان سے بچا لیا۔ واقعے سے بچی کے والدین کو بھی آگاہ کر دیا گیا، جو اپنی بیٹی کی آن لائن سرگرمیوں سے مکمل طور پر لاعلم تھے۔

این سی سی آئی اے حکام کا کہنا ہے کہ کیس کی تحقیقات جاری ہیں اور بچی سے رابطے میں رہنے والے آن لائن اکاؤنٹس کا سراغ لگایا جا رہا ہے۔ اس پہلو پر بھی تفتیش کی جا رہی ہے کہ آیا مذکورہ نیٹ ورک نے پاکستان میں مزید بچوں کو بھی نشانہ بنایا ہے۔

حکام کے مطابق تحقیقات کے نتائج سامنے آنے کے بعد نیٹ ورک سے متعلق مزید تفصیلات سامنے آنے کی توقع ہے۔