سندھ میں ایچ آئی وی سے متاثرہ بچوں کی ماؤں کے لیے ماہانہ 40 ہزار روپے امداد شروع، 157 خاندان مستفید ہوں گے

کراچی: سندھ کے محکمہ محنت نے ایچ آئی وی سے متاثرہ 157 بچوں کی ماؤں کو ماہانہ 40 ہزار روپے مالی امداد فراہم کرنے کا عمل شروع کردیا ہے۔ حکام کے مطابق اس اقدام کا مقصد متاثرہ بچوں کی غذائی ضروریات اور دیگر اخراجات پورے کرنے میں خاندانوں کی مدد کرنا ہے۔

حکام کا کہنا ہے کہ اس سلسلے میں اب تک 115 بچوں کی ماؤں کے بینک اکاؤنٹس کھول کر انہیں اے ٹی ایم کارڈز جاری کردیے گئے ہیں، تاکہ مالی امداد کی فراہمی ممکن بنائی جا سکے۔

محکمہ محنت کے مطابق کلثوم بائی ولیکا اسپتال میں ایچ آئی وی سے متاثرہ 130 بچے رجسٹرڈ ہیں، جبکہ لانڈھی اسپتال میں ایسے بچوں کی تعداد 27 ہے۔ اس طرح دونوں اسپتالوں میں مجموعی طور پر 157 بچے رجسٹرڈ ہیں۔

حکام نے بتایا کہ متاثرہ بچوں کے علاج کے لیے سندھ کے محکمہ محنت نے 2 ارب روپے کا انڈومنٹ فنڈ بھی منظور کیا ہے۔ اس فنڈ کا مقصد بچوں کے علاج معالجے کے لیے مالی وسائل فراہم کرنا ہے۔

تاہم حکام کی جانب سے تاحال یہ واضح نہیں کیا گیا کہ بچوں کی ماؤں کو ماہانہ 40 ہزار روپے کی مالی امداد کب تک فراہم کی جاتی رہے گی۔