کوئٹہ میں ایک ہی وقت میں 5 بچوں کی پیدائش، اہلخانہ خوشی سے نہال

(کوئٹہ )کوئٹہ کے ایک رہائشی کے گھر اس وقت خوشیوں کا سماں ہے جہاں ایک ہی وقت میں پانچ بچوں کی پیدائش ہوئی ہے۔ اس منفرد اور خوش آئند خبر کے بعد اہلخانہ، عزیز و اقارب اور دوست احباب کی جانب سے مبارکبادوں کا سلسلہ جاری ہے۔

ڈاکٹروں کے مطابق نومولود بچوں میں تین بیٹیاں اور دو بیٹے شامل ہیں۔ تمام بچوں کی پیدائش طبی ماہرین کی نگرانی میں ہوئی اور انہیں فوری طور پر خصوصی طبی نگہداشت فراہم کی گئی۔

اہلخانہ کے مطابق اس سے قبل بھی خاندان میں تین بچے موجود تھے، جبکہ پانچ نئے بچوں کی آمد کے بعد بچوں کی مجموعی تعداد آٹھ ہوگئی ہے، جس پر والدین بے حد خوش ہیں۔

ڈاکٹرز کا کہنا ہے کہ چونکہ ایک ہی وقت میں پانچ بچوں کی پیدائش ایک حساس طبی معاملہ ہوتا ہے، اس لیے احتیاطی تدابیر کے تحت پانچوں نومولود بچوں کو آئندہ 10 روز تک اسپتال کے خصوصی نگہداشت یونٹ (سپیشل کیئر) میں رکھا جائے گا، جہاں ماہر ڈاکٹر ان کی صحت کی مسلسل نگرانی کریں گے۔

طبی ماہرین نے امید ظاہر کی ہے کہ مناسب دیکھ بھال اور مسلسل طبی نگرانی کے باعث بچوں کی صحت بہتر رہے گی اور انہیں جلد صحت مند حالت میں گھر منتقل کر دیا جائے گا۔