پاکستان میں مقامی سطح پر 5G فونز کی تیاری میں نمایاں اضافہ، رجسٹرڈ ڈیوائسز 38 لاکھ سے تجاوز کر گئیں

(اسلام آباد) پاکستان میں مقامی سطح پر 5G موبائل فونز کی تیاری میں تیزی سے اضافہ ہو رہا ہے، جبکہ ملک میں رجسٹرڈ فائیو جی موبائل فونز کی تعداد 38 لاکھ 10 ہزار سے تجاوز کر گئی ہے۔

پاکستان ٹیلی کمیونیکیشن اتھارٹی (پی ٹی اے) کے مطابق مستقبل میں 5G سروس سے استفادہ کرنے کے لیے صارفین کے پاس 5G سے مطابقت رکھنے والے اسمارٹ فونز کا ہونا ضروری ہوگا۔

پی ٹی اے کی دستاویزات میں بتایا گیا ہے کہ بعض فائیو جی ڈیوائسز میں 5G سروس کو فعال کرنے کے لیے سافٹ ویئر اپ ڈیٹ بھی درکار ہوگا، اس لیے صارفین کو اپنے موبائل فونز کا سافٹ ویئر جدید ترین ورژن پر اپ ڈیٹ رکھنے کی ہدایت کی گئی ہے۔

اعداد و شمار کے مطابق اپریل کے دوران ملک میں 1 لاکھ 62 ہزار 40 فائیو جی موبائل فونز مقامی سطح پر تیار کیے گئے، جبکہ مئی تک مقامی طور پر تیار ہونے والی 5G ڈیوائسز کی مجموعی تعداد 9 لاکھ 61 ہزار 326 تک پہنچ گئی۔

پی ٹی اے کا کہنا ہے کہ مقامی سطح پر 5G اسمارٹ فونز کی پیداوار میں اضافے سے صارفین کو نسبتاً کم قیمت پر جدید ڈیوائسز دستیاب ہوں گی، جبکہ اس اقدام سے ملکی موبائل فون مینوفیکچرنگ انڈسٹری کو بھی فروغ ملے گا۔

ادارے کے مطابق مختلف موبائل فون کمپنیاں پاکستان میں مقامی سطح پر 5G ڈیوائسز تیار کر رہی ہیں، جس سے نہ صرف درآمدی انحصار میں کمی آئے گی بلکہ مستقبل میں 5G ٹیکنالوجی کے فروغ کے لیے بھی مضبوط بنیاد فراہم ہوگی۔