اداکار سہیل سمیر نے غیر اخلاقی وائرل کلپ پر صارفین سے معذرت کرلی

کراچی: سوشل میڈیا پر غیر اخلاقی ویڈیو کلپ وائرل ہونے کے بعد اداکار سہیل سمیر نے صارفین سے معذرت کرتے ہوئے اپنی غلطی کا اعتراف اور افسوس کا اظہار کیا ہے۔

اداکار سہیل سمیر نے Instagram پر جاری اپنے بیان میں کہا کہ وہ ان تمام افراد سے معذرت خواہ ہیں جنہیں وائرل کلپ کی وجہ سے دکھ، تکلیف یا مایوسی ہوئی۔

سہیل سمیر کے مطابق یہ کلپ تقریباً 10 سال پرانا ہے اور اس وقت انہیں شاید اندازہ نہیں تھا کہ ماضی کی کوئی حرکت مستقبل میں اس طرح دوبارہ سامنے آسکتی ہے۔

انہوں نے کہا کہ جب یہ کلپ دوبارہ وائرل ہوا تو انہیں احساس ہوا کہ ان کے گھر میں بھی ماں، بہنیں اور بیٹیاں ہیں، اور اگر ان کی اپنی فیملی کے کسی فرد کے بارے میں ایسا مواد سامنے آئے تو انہیں کیسا محسوس ہوگا۔

اداکار نے اپنی غلطی تسلیم کرتے ہوئے کہا کہ انہیں اس وقت ایسا مواد نہیں کرنا چاہیے تھا، چاہے حالات کچھ بھی رہے ہوں۔ انہوں نے کہا کہ وہ اس معاملے پر دل سے شرمندہ اور افسردہ ہیں۔

سہیل سمیر نے مزید کہا کہ عزت بنانے میں سالوں لگ جاتے ہیں لیکن اسے ختم ہونے میں صرف ایک لمحہ لگ سکتا ہے۔