ایمل ولی خان کی مولانا فضل الرحمان سے ملاقات، سیاسی صورتحال اور امن و امان پر تبادلہ خیال

اسلام آباد: عوامی نیشنل پارٹی (اے این پی) کے مرکزی صدر سینیٹر ایمل ولی خان نے وفد کے ہمراہ جمعیت علمائے اسلام (ف) کے سربراہ مولانا فضل الرحمان سے ان کی رہائش گاہ پر ملاقات کی، جس میں ملک کی مجموعی سیاسی صورتحال اور امن و امان سے متعلق اہم امور پر تبادلہ خیال کیا گیا۔

ملاقات کے دوران دونوں رہنماؤں نے خیبرپختونخوا اور بلوچستان میں امن و امان کی بگڑتی ہوئی صورتحال پر تشویش کا اظہار کیا اور خطے میں امن و استحکام کے لیے مؤثر اقدامات کی ضرورت پر زور دیا۔

اس موقع پر ملک کی موجودہ سیاسی صورتحال، باہمی دلچسپی کے امور اور قومی سطح پر درپیش چیلنجز پر بھی تفصیلی گفتگو ہوئی۔

دونوں رہنماؤں نے اس بات پر اتفاق کیا کہ ملک میں امن، سیاسی استحکام اور عوامی مسائل کے حل کے لیے تمام متعلقہ فریقوں کو مشترکہ کوششیں کرنا ہوں گی، جبکہ قومی یکجہتی اور باہمی مشاورت کو فروغ دینا وقت کی اہم ضرورت ہے۔

ملاقات خوشگوار ماحول میں ہوئی، جس میں دونوں جماعتوں کے وفود نے بھی شرکت کی اور مختلف قومی و علاقائی امور پر اپنے خیالات کا اظہار کیا۔