انسداد پولیو مہم مکمل، ملک بھر میں 2 کروڑ 93 لاکھ بچوں کو قطرے پلائے گئے

اسلام آباد :ملک کے 113 اضلاع میں ذیلی انسداد پولیو مہم مکمل ہوگئی، جس کے دوران 2 کروڑ 93 لاکھ بچوں کو پولیو سے بچاؤ کے قطرے پلائے گئے۔

نیشنل ایمرجنسی آپریشن سینٹر کے مطابق انسداد پولیو مہم میں 2 لاکھ 73 ہزار سے زائد فرنٹ لائن ورکرز نے حصہ لیا۔ سیکیورٹی صورتحال کے باعث جنوبی خیبرپختونخوا میں بچوں تک پولیو ویکسین کی رسائی متاثر رہی۔

تفصیلات کے مطابق پنجاب کے 11 اضلاع میں 90 لاکھ 70 ہزار سے زائد بچوں کو پولیو سے بچاؤ کے قطرے پلائے گئے، جبکہ سندھ کے 30 اضلاع میں ایک کروڑ 14 لاکھ بچوں کی ویکسینیشن کی گئی۔

خیبرپختونخوا کے 37 اضلاع میں 72 لاکھ بچوں کو پولیو ویکسین دی گئی۔ بلوچستان کے 32 اضلاع میں 23 لاکھ جبکہ اسلام آباد میں 4 لاکھ 43 ہزار بچوں کو پولیو سے بچاؤ کے قطرے پلائے گئے۔

گلگت بلتستان کے دو اضلاع میں بھی تقریباً ایک لاکھ 40 ہزار بچوں کی ویکسینیشن مکمل کی گئی۔

حکام کے مطابق مہم کا مقصد پانچ سال سے کم عمر بچوں کو پولیو سے محفوظ بنانا اور ملک سے پولیو کے مکمل خاتمے کی کوششوں کو مزید مؤثر بنانا ہے۔