کینیڈین وزیر خارجہ کی فیلڈ مارشل عاصم منیر سے ملاقات، دہشت گردی کے خلاف پاکستان کے کردار کو سراہا

راولپنڈی: کینیڈا کی وزیر خارجہ انیتا آنند نے جنرل ہیڈکوارٹرز (جی ایچ کیو) راولپنڈی کا دورہ کیا، جہاں انہوں نے چیف آف آرمی اسٹاف فیلڈ مارشل سید عاصم منیر سے ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق ملاقات میں باہمی دلچسپی کے امور، علاقائی اور عالمی سیکیورٹی کی صورتحال، پاک۔کینیڈا تعلقات، دفاعی تعاون اور خطے میں امن و استحکام سے متعلق امور پر تفصیلی تبادلہ خیال کیا گیا۔

آئی ایس پی آر کے مطابق فیلڈ مارشل سید عاصم منیر نے خطے میں امن و استحکام کے لیے پاکستان کے اصولی مؤقف کو اجاگر کرتے ہوئے کہا کہ موجودہ سیکیورٹی چیلنجز سے مؤثر انداز میں نمٹنے کے لیے باہمی اعتماد، تعاون اور مشترکہ کوششیں ناگزیر ہیں۔

ملاقات کے دوران کینیڈا کی وزیر خارجہ انیتا آنند نے دہشت گردی کے خلاف جنگ میں پاکستان کی قربانیوں، سیکیورٹی فورسز کی پیشہ ورانہ خدمات اور علاقائی امن کے لیے پاکستان کے کردار کو سراہا۔ انہوں نے عالمی امن و استحکام کے فروغ میں پاکستان کی کوششوں کو بھی قابلِ تحسین قرار دیا۔

آئی ایس پی آر کے مطابق دونوں رہنماؤں نے پاکستان اور کینیڈا کے درمیان دفاعی و سیکیورٹی تعاون کو مزید فروغ دینے، اعلیٰ سطح کے روابط کو بڑھانے اور مختلف شعبوں میں دوطرفہ تعاون کو وسعت دینے کے عزم کا اعادہ کیا۔

بیان کے مطابق ملاقات خوشگوار ماحول میں ہوئی، جس میں باہمی اعتماد، شراکت داری اور مشترکہ مفادات پر مبنی تعلقات کو مزید مضبوط بنانے پر اتفاق کیا گیا۔