پاکستان اور بھارت کے کوک اسٹوڈیو میں کیا فرق ہے؟ عاطف اسلم کا معنی خیز جواب

لاہور: پاکستان کے معروف گلوکار عاطف اسلم نے پاکستانی اور بھارتی کوک اسٹوڈیو کے درمیان فرق بیان کرتے ہوئے کہا ہے کہ پاکستانی کوک اسٹوڈیو کی اصل برتری اس کا ’’جادو‘‘ ہے۔

ایک انٹرویو کے دوران عاطف اسلم سے پاکستان اور بھارت کے کوک اسٹوڈیو میں پیش کی جانے والی موسیقی کے فرق کے بارے میں سوال کیا گیا۔ ان سے پوچھا گیا کہ پاکستانی کوک اسٹوڈیو کو بھارتی ورژن پر کیا برتری حاصل ہے تو گلوکار نے مسکراتے ہوئے ایک لفظ میں جواب دیا، ’’جادو‘‘۔

عاطف اسلم کا کہنا تھا کہ دونوں ممالک میں موسیقی اور دھنوں پر بہترین کام ہو رہا ہے، تاہم ان کے مطابق بھارتی موسیقی میں وہ خام پن اور اصلیت کم نظر آتی ہے جو پاکستانی موسیقی کی خاص پہچان ہے۔

انہوں نے کہا کہ بھارتی کوک اسٹوڈیو میں کمرشل پہلوؤں پر نسبتاً زیادہ توجہ دی جاتی ہے، جبکہ پاکستانی کوک اسٹوڈیو میں اصل، منفرد اور تخلیقی دھنوں پر خصوصی کام کیا جاتا ہے۔

معروف گلوکار کے مطابق پاکستانی کوک اسٹوڈیو کی موسیقی کی تیاری میں متعدد فنکار اور موسیقار مل کر کام کرتے ہیں، جبکہ گلوکاروں کو بھی اپنی تخلیقی صلاحیتوں اور منفرد انداز کو موسیقی میں شامل کرنے کی آزادی حاصل ہوتی ہے۔

عاطف اسلم کے اس دلچسپ اور معنی خیز جواب نے ایک بار پھر پاکستانی موسیقی کی منفرد شناخت اور کوک اسٹوڈیو پاکستان کی مقبولیت کو موضوع بحث بنا دیا ہے۔