کویت میں امریکی فوجی اڈوں پر ایرانی ڈرون حملوں کا دعویٰ، العدیری کیمپ اور علی السالم ایئر بیس کو نشانہ بنانے کا اعلان

تہران: ایرانی فوج نے دعویٰ کیا ہے کہ اس نے آپریشن "لائٹننگ" کے سولہویں مرحلے کے تحت کویت میں واقع دو امریکی فوجی اڈوں پر ڈرون حملے کیے ہیں، جن میں ایک اسلحہ ڈپو اور فضائی دفاعی نظام کو نشانہ بنایا گیا۔

ایرانی فوج کی جانب سے جاری بیان کے مطابق العدیری کیمپ میں موجود ایک اسلحہ ڈپو کو نشانہ بنایا گیا، جبکہ علی السالم ایئر بیس پر نصب پیٹریاٹ ریڈار اور فضائی نگرانی کے ایک ریڈار کو ڈرون حملوں کا ہدف بنایا گیا۔

بیان میں کہا گیا کہ یہ کارروائی ایران پر ہونے والے امریکی حملوں کے جواب میں کی گئی، جن میں ایرانی حکام کے مطابق شہری انفراسٹرکچر اور رہائشی علاقوں کو نشانہ بنایا گیا تھا۔

دوسری جانب، اس خبر کے اجرا تک کویتی حکومت، کویتی فوج یا امریکی حکام کی جانب سے ان حملوں کی تصدیق یا تردید میں کوئی باضابطہ بیان سامنے نہیں آیا۔

ادھر ایرانی سرکاری میڈیا نے یہ بھی دعویٰ کیا ہے کہ ایرانی افواج نے شمالی عراق میں موجود کردستان فریڈم پارٹی کے مبینہ ٹھکانوں پر بھی شدید حملے کیے ہیں۔ رپورٹس کے مطابق یہ کارروائیاں عراق کے کرد علاقے کے دو بڑے شہروں اربیل اور سلیمانیہ میں کی گئیں۔

ایرانی میڈیا کے مطابق ان حملوں میں ہونے والے جانی یا مالی نقصانات کی تفصیلات فوری طور پر سامنے نہیں آسکیں۔

دریں اثنا، امریکی فوج نے دعویٰ کیا ہے کہ اس نے عراق کے شہر اربیل میں امریکی قونصل خانے کے قریب بارود سے لدے ایک ڈرون کو مار گرایا، تاہم اس واقعے کے بارے میں مزید تفصیلات جاری نہیں کی گئیں۔