بنوں: میریان پولیس اسٹیشن پر خودکش حملے کی کوشش ناکام، ایک اہلکار شہید، پانچ افراد زخمی

خیبر پختونخوا کے ضلع بنوں میں میریان پولیس اسٹیشن کے قریب خودکش حملے کی کوشش پولیس کی بروقت کارروائی سے ناکام بنا دی گئی۔ حملے میں ایک پولیس اہلکار شہید جبکہ پولیس اہلکار سمیت پانچ افراد زخمی ہو گئے۔

ڈی پی او بنوں فرقان بلال کے مطابق بدھ کی شام بارود سے بھری ایک گاڑی پولیس اسٹیشن کے قریب دھماکے سے ٹکرائی، جس کے فوراً بعد حملہ آوروں نے پولیس اسٹیشن میں داخل ہونے کی کوشش کی، تاہم پولیس کی فوری اور مؤثر جوابی کارروائی کے باعث ان کا منصوبہ ناکام بنا دیا گیا۔

انہوں نے بتایا کہ دھماکے کے بعد سکیورٹی اہلکاروں اور حملہ آوروں کے درمیان فائرنگ کا تبادلہ بھی ہوا، جس کے نتیجے میں ایک پولیس اہلکار شہید جبکہ پانچ افراد زخمی ہوئے۔ زخمیوں کو فوری طور پر ڈسٹرکٹ ہیڈکوارٹر (ڈی ایچ کیو) اسپتال بنوں منتقل کیا گیا، جہاں انہیں طبی امداد فراہم کی جا رہی ہے۔

واقعے کے بعد سکیورٹی فورسز نے علاقے کو گھیرے میں لے کر سرچ اور کلیئرنس آپریشن شروع کر دیا تاکہ کسی بھی ممکنہ خطرے کا مکمل خاتمہ کیا جا سکے۔

حملے کے بعد کمشنر بنوں ڈویژن کیپٹن (ر) خالد محمود، ڈی آئی جی بنوں ریجن رب نواز خان، ڈپٹی کمشنر بنوں محمد فہیم، اسسٹنٹ کمشنر اللہ نواز خان، اسسٹنٹ کمشنر اخلاص سلیم اور اسسٹنٹ کمشنر سجاد حسین نے ڈی ایچ کیو اسپتال کا دورہ کیا اور زخمیوں کی عیادت کرتے ہوئے علاج معالجے کی سہولیات کا جائزہ لیا۔

دوسری جانب شہید پولیس اہلکار کی نماز جنازہ پولیس لائنز بنوں میں سرکاری اعزاز کے ساتھ ادا کی گئی۔ نماز جنازہ میں اعلیٰ سول و عسکری حکام، پولیس افسران، اہلکاروں اور شہریوں کی بڑی تعداد نے شرکت کی۔ اس موقع پر شہید کو سلامی پیش کی گئی اور ملک میں امن و امان کے قیام کے لیے ان کی قربانی کو خراجِ عقیدت پیش کیا گیا۔