آئی سی سی کی نئی ون ڈے رینکنگ جاری، بابر اعظم چھٹے نمبر پر پہنچ گئے، شاہین اور حارث رؤف کی بھی ترقی

دبئی: انٹرنیشنل کرکٹ کونسل (آئی سی سی) نے ون ڈے کرکٹ کی تازہ پلیئرز رینکنگ جاری کر دی ہے، جس میں پاکستان کے اسٹار بیٹر بابر اعظم ایک درجے ترقی کے بعد چھٹے نمبر پر آ گئے ہیں، جبکہ قومی ٹیم کے فاسٹ بولرز شاہین شاہ آفریدی اور حارث رؤف نے بھی نمایاں بہتری حاصل کی ہے۔

آئی سی سی کی تازہ رینکنگ کے مطابق نیوزی لینڈ کے ڈیرل مچل بدستور ون ڈے بیٹرز کی فہرست میں پہلی پوزیشن پر موجود ہیں۔ آئرلینڈ کے ہیری ٹیکر ساتویں نمبر پر برقرار ہیں، جبکہ انگلینڈ کے جو روٹ چار درجے ترقی کے بعد آٹھویں پوزیشن پر پہنچ گئے ہیں۔

بھارت کے شریاس ایئر تیرہویں نمبر پر آ گئے ہیں، جبکہ افغانستان کے رحمان اللہ گرباز، سری لنکا کے پاتھم نسانکا اور پاکستان کے سلمان علی آغا نے دو، دو درجے ترقی کرتے ہوئے بالترتیب چودہویں، پندرہویں اور سولہویں پوزیشن حاصل کر لی ہے۔

ون ڈے بولرز کی رینکنگ میں افغانستان کے راشد خان بدستور پہلی پوزیشن پر موجود ہیں۔ انگلینڈ کے جوفرا آرچر تیسرے اور نیوزی لینڈ کے مچل سینٹنر چوتھے نمبر پر برقرار ہیں۔

پاکستان کے اسٹار فاسٹ بولر شاہین شاہ آفریدی نے دو درجے ترقی کرتے ہوئے ساتویں نمبر پر جگہ بنا لی ہے، جبکہ حارث رؤف بھی دو درجے بہتری کے بعد بیسویں نمبر پر پہنچ گئے ہیں۔

آل راؤنڈرز کی فہرست میں افغانستان کے عظمت اللہ عمرزئی پہلی پوزیشن پر بدستور براجمان ہیں، جبکہ نیوزی لینڈ کے مائیکل بریسویل دو درجے ترقی کے بعد تیسرے نمبر پر پہنچ گئے ہیں۔

کرکٹ ماہرین کے مطابق تازہ آئی سی سی رینکنگ میں پاکستانی کھلاڑیوں کی بہتری مستقبل کی سیریز کے لیے قومی ٹیم کے اعتماد میں اضافے کا باعث بن سکتی ہے۔