بیرسٹر گوہر کا عمران خان کے آفیشل ایکس اکاؤنٹ سے لاتعلقی کا اظہار

اسلام آباد: چیئرمین پاکستان تحریک انصاف (پی ٹی آئی) بیرسٹر گوہر علی خان نے بانی پی ٹی آئی عمران خان کے آفیشل ایکس اکاؤنٹ سے لاتعلقی کا اظہار کرتے ہوئے کہا ہے کہ پارٹی اس اکاؤنٹ کی ملکیت کا دعویٰ نہیں کرتی۔ اسلام آباد ہائی کورٹ نے معاملے پر تحریری جواب جمع کرانے کے لیے مہلت دیتے ہوئے کیس کی سماعت 23 نومبر تک ملتوی کردی۔

اسلام آباد ہائی کورٹ کے جسٹس ارباب محمد طاہر نے شہری کی جانب سے عمران خان کا آفیشل ایکس اکاؤنٹ بند کرنے سے متعلق دائر درخواست پر سماعت کی۔ اس موقع پر بیرسٹر گوہر علی خان، بانی پی ٹی آئی کے وکلا خالد یوسف چوہدری اور شمسہ کیانی، جبکہ نیشنل سائبر کرائم انویسٹی گیشن ایجنسی

(این سی سی آئی اے) کے حکام بھی عدالت میں پیش ہوئے۔

پی ٹی آئی اس اکاؤنٹ کو کلیم نہیں کرتی، بیرسٹر گوہر

سماعت کے دوران جسٹس ارباب محمد طاہر نے بیرسٹر گوہر سے مکالمہ کرتے ہوئے کہا کہ انہیں ذاتی طور پر طلب نہیں کیا گیا تھا بلکہ صرف تحریری جواب بھیجنے کی ہدایت کی گئی تھی۔

اس موقع پر بیرسٹر گوہر نے عدالت کو بتایا کہ پاکستان تحریک انصاف عمران خان کے آفیشل ایکس اکاؤنٹ کو کلیم نہیں کرتی۔

انہوں نے عدالت سے استدعا کی کہ حالات تبدیل ہوچکے ہیں، اس لیے جواب جمع کرانے کے لیے مزید وقت دیا جائے تاکہ معاملے پر تفصیلی مؤقف پیش کیا جاسکے۔

عدالت نے تحریری جواب کے لیے مہلت دے دی

بیرسٹر گوہر کی استدعا پر جسٹس ارباب محمد طاہر نے کہا کہ انہیں وقت دیا جا رہا ہے اور وہ اپنا مؤقف تحریری طور پر جمع کرائیں۔

چیئرمین پی ٹی آئی نے مزید وقت دینے کی درخواست کرتے ہوئے کہا کہ اگر عدالت مہلت دے تو وہ تفصیلی جواب جمع کرا دیں گے۔

عدالت نے بیرسٹر گوہر کی استدعا منظور کرتے ہوئے تحریری جواب جمع کرانے کے لیے مہلت دے دی۔

عمران خان کے ایکس اکاؤنٹ کی بندش کا کیس 23 نومبر تک ملتوی

اسلام آباد ہائی کورٹ نے سماعت کے دوران دی گئی مہلت کے بعد کیس کی مزید سماعت 23 نومبر تک ملتوی کردی۔

آئندہ سماعت پر متعلقہ فریقین کے تحریری جوابات اور مؤقف کی روشنی میں درخواست پر مزید کارروائی کی جائے گی۔ مقدمے میں عمران خان کے آفیشل ایکس اکاؤنٹ کو بند کرنے سے متعلق درخواست زیر سماعت ہے۔