برطانیہ، فرانس کا یوکرین کی فوجی مدد بڑھانے کا اعلان

لندن/پیرس: برطانیہ اور فرانس نے یوکرین کے لیے فوجی حمایت مزید بڑھانے کے عزم کا اظہار کرتے ہوئے روسی حملوں کے مقابلے میں یوکرین کی دفاعی صلاحیت مضبوط بنانے پر زور دیا ہے۔

برطانوی حکومت کے مطابق برطانیہ یوکرین کو جدید اور خفیہ فوجی ٹیکنالوجی فراہم کرنے میں معاونت کرے گا، جبکہ یوکرین کو طویل فاصلے تک مار کرنے والے میزائل تیار کرنے کی صلاحیت بڑھانے میں بھی مدد دی جائے گی۔

برطانوی وزیراعظم نے کہا کہ روسی حملوں کے خلاف یوکرین کا دفاع مضبوط بنانا ضروری ہے اور برطانیہ یوکرین کی حمایت جاری رکھے گا۔

دوسری جانب فرانس نے بھی یوکرین کی دفاعی ضروریات پوری کرنے کے لیے تعاون بڑھانے کا اعلان کیا ہے۔ فرانسیسی قیادت نے یوکرین کو فضائی دفاعی میزائل جلد فراہم کرنے کی ضرورت پر زور دیا تاکہ روسی حملوں سے اہم تنصیبات اور شہری علاقوں کا تحفظ بہتر بنایا جا سکے۔

برطانیہ اور فرانس کی جانب سے یہ اعلانات ایسے وقت میں سامنے آئے ہیں جب یوکرین کو روسی حملوں کے مقابلے میں فضائی دفاع اور طویل فاصلے تک مار کرنے والے ہتھیاروں کی ضرورت پر مسلسل زور دیا جا رہا ہے۔

دونوں یورپی ممالک نے واضح کیا ہے کہ وہ یوکرین کے ساتھ کھڑے ہیں اور اس کی دفاعی صلاحیت میں اضافے کے لیے تعاون جاری رکھیں گے۔