آسٹریلیا کو دھچکا، کیمرون گرین جنوبی افریقا کے خلاف پہلے ٹیسٹ سے باہر

آسٹریلیا کے آل راؤنڈر کیمرون گرین پیٹ کی تکلیف کے باعث جنوبی افریقا کے خلاف ڈربن میں ہونے والے پہلے ٹیسٹ میچ سے باہر ہوگئے ہیں۔

آسٹریلوی ٹیم انتظامیہ کو امید ہے کہ کیمرون گرین سیریز کے اگلے میچز میں بطور بلے باز ایکشن میں واپس آسکتے ہیں، تاہم ان کے بولنگ کرنے کے امکانات انتہائی کم ہیں۔

کیمرون گرین کو پوچفسٹروم میں آخری ون ڈے میچ کے دوران انجری کا سامنا کرنا پڑا تھا۔ وہ کوربن بوش کے خلاف تین گیندوں کے مختصر اسپیل کے دوران پیٹ پر گیند لگنے کے بعد تکلیف میں مبتلا ہوئے۔ اس کے باوجود انہوں نے بعد میں چھکا لگایا، تاہم اگلی ہی گیند پر آؤٹ ہوگئے۔

آسٹریلیا کے ہیڈ کوچ اینڈریو میک ڈونلڈ کے مطابق کیمرون گرین کی بحالی کا عمل مثبت انداز میں جاری ہے، تاہم ٹیم ان کی واپسی کے معاملے میں کوئی خطرہ مول نہیں لینا چاہتی۔

ہیڈ کوچ نے کہا کہ گرین کی واپسی کی صورت میں ابتدائی طور پر توجہ صرف بیٹنگ پر ہوگی اور ان سے بولنگ کرانے کا فیصلہ احتیاط سے کیا جائے گا۔

کیمرون گرین کی عدم دستیابی آسٹریلوی ٹیم کے لیے اہم نقصان ہے، کیونکہ وہ حالیہ عرصے میں اچھی فارم میں نظر آئے ہیں۔