چیف جسٹس نے پنجاب پراسیکیوشن کی کارکردگی قابلِ اطمینان قرار دے دی

اسلام آباد: چیف جسٹس پاکستان یحییٰ آفریدی نے پنجاب پراسیکیوشن کی کارکردگی کو قابلِ اطمینان قرار دیتے ہوئے کہا ہے کہ پنجاب پراسیکیوشن کا طریقۂ کار اور پیشہ ورانہ کارکردگی قابلِ تعریف ہے۔

چیف جسٹس پاکستان یحییٰ آفریدی سے پراسیکیوٹر جنرل پنجاب چودھری عرفان صادق تارڑ کی قیادت میں وفد نے ملاقات کی، جس میں پنجاب پراسیکیوشن کی کارکردگی اور محکمہ میں ہونے والی اصلاحات پر گفتگو کی گئی۔

اس موقع پر چیف جسٹس یحییٰ آفریدی نے کہا کہ پنجاب پراسیکیوشن میں خدمات انجام دینے والے پراسیکیوٹرز انتہائی قابل اور پیشہ ورانہ صلاحیتوں کے حامل ہیں۔ انہوں نے کہا کہ پنجاب پراسیکیوشن سے کسی قسم کی شکایت نہیں، جبکہ اس کی مجموعی کارکردگی قابلِ اطمینان ہے۔

چیف جسٹس پاکستان کا کہنا تھا کہ پنجاب پراسیکیوشن کی کارکردگی دیگر صوبوں کے لیے قابلِ تقلید ہے۔ دیگر صوبے پنجاب پراسیکیوشن سے مدد اور رہنمائی حاصل کریں اور اس کے مؤثر طریقۂ کار اور تجربات سے استفادہ کریں۔

پراسیکیوٹر جنرل پنجاب چودھری عرفان صادق تارڑ نے کہا کہ پنجاب پراسیکیوشن نے جدید تقاضوں سے ہم آہنگ ایک مؤثر نظام وضع کیا ہے۔ چیف جسٹس پاکستان کی جانب سے محکمہ کی کارکردگی کا اعتراف پنجاب پراسیکیوشن کے لیے باعثِ اعزاز ہے۔

انہوں نے کہا کہ چیف جسٹس پاکستان کی حوصلہ افزائی سے افسران اور پراسیکیوٹرز کو مزید محنت کرنے کا حوصلہ ملے گا۔ قانون کی حکمرانی اور انصاف کی مؤثر فراہمی کے لیے اصلاحات کا سلسلہ مزید تیز کیا جائے گا۔