چیف آف دی نیول اسٹاف امیچور گالف کپ 2026 کا اسلام آباد میں آغاز، مقابلے 25 اکتوبر تک جاری رہیں گے

اسلام آباد: 19ویں چیف آف دی نیول اسٹاف امیچور گالف کپ 2026 کا اسلام آباد میں آغاز ہوگیا۔ ایونٹ 22 سے 25 اکتوبر تک جاری رہے گا، جس میں مردوں، خواتین، سینئرز اور جونیئرز سمیت مختلف کیٹیگریز کے گالفرز حصہ لیں گے۔پیٹرن پاکستان نیوی گالف (نارتھ) ریئر ایڈمرل احمد حسین نے میڈیا بریفنگ کے دوران ایونٹ کی نمایاں خصوصیات، مقابلوں کے طریقۂ کار اور شرکاء کی تفصیلات سے آگاہ کیا۔

ریئر ایڈمرل احمد حسین کے مطابق ایونٹ میں مردوں کے امیچرز کے 54 ہولز، خواتین کے امیچرز اور سینئرز کے 36، جبکہ جونیئرز کیٹیگری کے 18 ہولز پر مشتمل مقابلے منعقد ہوں گے۔ اس کے علاوہ مہمانوں اور اسپانسرز کے لیے ایک دعوتی مقابلے کا بھی اہتمام کیا جائے گا۔

انہوں نے کہا کہ چیف آف دی نیول اسٹاف امیچور گالف کپ 2007 سے پاکستان کے قومی گالف سرکٹ میں ایک نمایاں مقام حاصل کر چکا ہے۔ یہ ایونٹ صحت مند مسابقت کو فروغ دینے، مثبت سرگرمیوں کی حوصلہ افزائی اور پاکستان کا مثبت تشخص اجاگر کرنے میں اہم کردار ادا کرتا ہے۔

ریئر ایڈمرل احمد حسین نے مزید کہا کہ اس ایونٹ کا باقاعدہ انعقاد قومی اور بین الاقوامی سطح پر گالف کے فروغ کے لیے پاک بحریہ کے عزم کا عکاس ہے۔