چین ایران کو معاشی طور پر تنہا کرنے میں تعاون کیلئے تیار ہے: جے ڈی وینس

واشنگٹن :امریکی نائب صدر جے ڈی وینس نے کہا ہے کہ چین ایران کو معاشی طور پر تنہا کرنے کی کوششوں میں امریکا کے ساتھ تعاون کیلئے تیار ہے، تاہم انہیں معلوم نہیں کہ ایران کے ساتھ جاری جنگ نومبر میں ہونے والے امریکی مڈٹرم انتخابات تک ختم ہوگی یا نہیں۔

وائٹ ہاؤس میں میڈیا بریفنگ کے دوران جے ڈی وینس نے کہا کہ چین ایرانی تیل کا ایک بڑا خریدار ہے، اس لیے بیجنگ ایران پر معاشی دباؤ بڑھانے کی امریکی کوششوں میں اہم کردار ادا کرسکتا ہے۔

ایران سے مذاکرات کیلئے امریکا کی شرط

امریکی نائب صدر نے واضح کیا کہ جب تک ایران تجارتی اور بحری جہازوں پر فائرنگ بند نہیں کرتا، امریکا تہران سے مذاکرات نہیں کرے گا۔

ان کا کہنا تھا کہ ایران کے معاملے میں تمام آپشنز میز پر موجود ہیں، تاہم امریکا اپنے ممکنہ اقدامات کی تفصیلات ظاہر نہیں کرے گا۔

جے ڈی وینس نے دعویٰ کیا کہ ایران کا آبنائے ہرمز پر اسٹریٹجک اختیار عملی طور پر ختم ہو چکا ہے، جبکہ امریکا آبنائے ہرمز میں تجارتی جہازوں کو تحفظ فراہم کرنے کیلئے کام کر رہا ہے۔

آبنائے ہرمز سے تیل کی ترسیل جاری ہے: جے ڈی وینس

جے ڈی وینس نے کہا کہ آبنائے ہرمز سے تیل کی ترسیل جنگ سے پہلے کی سطح کے قریب پہنچ چکی ہے۔ ان کے مطابق گزشتہ روز تقریباً 150 کروڑ بیرل تیل آبنائے ہرمز سے نکلا۔

انہوں نے تیل اور گیس کی قیمتوں میں اضافے کی ایک وجہ ایرانی آئل ٹینکرز اور تجارتی جہازوں سے متعلق حملوں کو قرار دیا۔

ایران کو جوہری ہتھیار حاصل نہیں کرنے دیں گے

امریکی نائب صدر نے ایک بار پھر واضح کیا کہ امریکا ایران کو جوہری ہتھیار حاصل کرنے کی اجازت نہیں دے گا۔

ان کا کہنا تھا کہ امریکا آبنائے ہرمز کی صورتحال پر بھرپور توجہ دے رہا ہے اور وہاں موجود بحری جہازوں کے تحفظ کیلئے اقدامات کیے جا رہے ہیں۔

ایرانی شادی کی تقریب پر حملے کی تحقیقات جاری

ایران میں شادی کی ایک تقریب پر حملے کے حوالے سے جے ڈی وینس نے کہا کہ امریکا اپنی جنگی کارروائیوں میں عام شہریوں کو نشانہ نہیں بناتا۔

انہوں نے ایرانی سرکاری میڈیا کی رپورٹس پر شکوک و شبہات کا اظہار کرتے ہوئے کہا کہ سینٹکام واقعے کی تحقیقات کر رہا ہے۔

جے ڈی وینس کا کہنا تھا کہ امریکا ایران کے ساتھ جنگ کے خاتمے کے امکانات پر کوئی حتمی ٹائم لائن نہیں دے سکتا اور یہ کہنا بھی ممکن نہیں کہ جنگ نومبر کے مڈٹرم انتخابات سے قبل ختم ہوگی یا نہیں۔