بھارتی حکومت نے وزیر تعلیم کے استعفے پر ایک دن کی مہلت مانگ لی، طلبا کا دھرنا جاری رکھنے کا اعلان

نئی دہلی: بھارتی حکومت نے کاکروچ جنتا پارٹی سے تعلق رکھنے والے طلبا کی جانب سے وزیر تعلیم دھرمیندر پردھان کے استعفے کے مطالبے پر ایک دن کی مہلت مانگ لی ہے، جبکہ دونوں فریقوں کے درمیان مذاکرات کا ایک اور دور کل ہونے کا امکان ہے۔

بھارتی میڈیا کے مطابق کاکروچ جنتا پارٹی کے نمائندوں اور حکومتی وفد کے درمیان ہونے والی اہم ملاقات میں طلبا تنظیم کے دو مطالبات پر حکومت نے اصولی طور پر رضامندی ظاہر کر دی، تاہم وزیر تعلیم دھرمیندر پردھان کے استعفے کے معاملے پر حتمی فیصلہ کرنے کے لیے کل تک کا وقت طلب کیا گیا ہے۔

طلبا تنظیم کا کہنا ہے کہ امکان ہے کہ وزیر تعلیم دھرمیندر پردھان کل اپنے عہدے سے مستعفی ہو جائیں، تاہم تنظیم نے واضح کیا ہے کہ استعفے کے مطالبے پر کسی قسم کا سمجھوتہ نہیں کیا جائے گا۔

رپورٹس کے مطابق حکومتی وفد اور طلبا نمائندوں کے درمیان مذاکرات کا اگلا دور کل ہوگا۔ اس دوران طلبا نے اعلان کیا ہے کہ نئی دہلی کے جنتر منتر پر جاری دھرنا مطالبات کی منظوری تک بدستور جاری رکھا جائے گا۔