وفاقی دارالحکومت میں شیشہ کیفے چلانے پر تاحکمِ ثانی مکمل پابندی عائد

اسلام آباد میں شیشہ کیفے چلانے پر تاحکمِ ثانی مکمل پابندی عائد کردی گئی ہے، جس کا اطلاق این او سی رکھنے والے شیشہ کیفے پر بھی ہوگا۔

ضلعی انتظامیہ کے مطابق ڈپٹی کمشنر اسلام آباد نے تمام اسسٹنٹ کمشنرز کو پابندی پر سختی سے عملدرآمد یقینی بنانے کے احکامات جاری کردیئے ہیں۔ انتظامیہ کا کہنا ہے کہ ان ڈور اور آؤٹ ڈور دونوں مقامات پر شیشہ چلانے کی اجازت نہیں ہوگی۔

حکام کے مطابق پابندی کی خلاف ورزی کرنے والے شیشہ کیفے کو سیل کرنے کے ساتھ ساتھ مالک کے خلاف مقدمہ بھی درج کیا جائے گا۔

تمام اسسٹنٹ کمشنرز کو بلاامتیاز کارروائی کرنے اور روزانہ کی بنیاد پر شیشہ کیفے کی انسپیکشن یقینی بنانے کی ہدایت بھی جاری کردی گئی ہے۔