امریکا، ایران کشیدگی کے باعث عالمی منڈی میں خام تیل کی قیمتوں میں مسلسل اضافہ

لندن: امریکا اور ایران کے درمیان بڑھتی ہوئی کشیدگی کے اثرات عالمی توانائی مارکیٹ پر نمایاں ہونے لگے ہیں، جہاں خام تیل کی قیمتوں میں مسلسل اضافہ ریکارڈ کیا جا رہا ہے۔

عالمی منڈی میں برینٹ کروڈ آئل کی قیمت میں مزید 4.87 فیصد اضافہ ہوا، جس کے بعد اس کی قیمت 98.65 ڈالر فی بیرل سے تجاوز کر گئی۔

دوسری جانب ویسٹ ٹیکساس انٹرمیڈیٹ (WTI) کروڈ آئل بھی 3.95 فیصد مہنگا ہوگیا، جس کے بعد اس کی قیمت بڑھ کر 90.26 ڈالر فی بیرل تک پہنچ گئی۔

ماہرین کے مطابق مشرق وسطیٰ میں بڑھتی ہوئی جغرافیائی کشیدگی اور امریکا و ایران کے درمیان تناؤ کے باعث عالمی منڈی میں تیل کی فراہمی سے متعلق خدشات بڑھ رہے ہیں، جس کے نتیجے میں خام تیل کی قیمتوں میں تیزی دیکھی جا رہی ہے۔

تجزیہ کاروں کا کہنا ہے کہ اگر خطے میں کشیدگی برقرار رہی یا مزید شدت اختیار کر گئی تو خام تیل کی قیمتوں میں مزید اضافہ ہو سکتا ہے، جس کے اثرات عالمی معیشت، مہنگائی اور ایندھن کی مقامی قیمتوں پر بھی مرتب ہونے کا امکان ہے۔