یومِ دفاع و شہدا: پاک فوج کا ملکی سلامتی اور بقا کے لیے ہر قربانی دینے کا عزم

اسلام آباد: یومِ دفاع و شہدا کے موقع پر افواجِ پاکستان نے ملکی سلامتی، خودمختاری، دفاع اور بقا کے لیے ہر قسم کی قربانی دینے کے عزم کا اظہار کیا ہے۔

افواجِ پاکستان کے افسران اور جوانوں کا کہنا ہے کہ دفاعِ وطن، بقائے وطن اور ملکی سلامتی کے لیے پاک فوج ہر لمحہ تیار ہے۔ پاک فوج کا ہر جوان وطن کا محافظ ہے اور ملک کی سرحدوں، سلامتی اور مستقبل کے تحفظ کو اپنی ذمہ داری سمجھتا ہے۔

فوجی افسران اور جوانوں نے کہا کہ تاریخ گواہ ہے کہ جب بھی دشمن نے پاکستان کی طرف میلی آنکھ سے دیکھا، پاک افواج نے سینہ سپر ہو کر وطن کا دفاع کیا اور ملکی سلامتی کو ہمیشہ مقدم رکھا۔

انہوں نے کہا کہ وطن سے محبت اور فرض شناسی کے جذبے کے تحت پاک فوج نے ہر ذمہ داری بھرپور انداز میں نبھائی ہے، جبکہ پاکستانی ہونے پر انہیں ہمیشہ فخر رہا ہے۔

افواجِ پاکستان کے مطابق ملک کی ترقی، استحکام اور خوشحالی کے لیے پاک فوج اور عوام متحد ہو کر اپنا کردار ادا کریں گے۔ یومِ دفاع و شہدا کے موقع پر وطن کے محافظوں نے محنت، اتحاد اور قومی یکجہتی کے ذریعے پاکستان کو ترقی اور کامیابی کی منزل تک پہنچانے کے عزم کا بھی اظہار کیا۔