ٹرمپ کا ایران کو سخت انتباہ، توانائی اہداف، بجلی گھر اور پل تباہ کرنے کی دھمکی

(واشنگٹن )امریکی صدر ڈونلڈ ٹرمپ نے ایران کے خلاف سخت مؤقف اختیار کرتے ہوئے کہا ہے کہ ایران کے توانائی کے اہداف کو آخر میں نشانہ بنایا جائے گا اور اس کے تمام بجلی گھروں کو تباہ کر دیا جائے گا۔

فاکس نیوز کو دیے گئے ایک انٹرویو میں صدر ٹرمپ نے کہا کہ ایران کے خلاف فوجی کارروائیاں اس وقت تک جاری رہیں گی جب تک وہ خود یہ فیصلہ نہ کریں کہ اب کارروائی روکنے کا وقت آ گیا ہے۔

انہوں نے دعویٰ کیا کہ ایران کے تمام پل بھی تباہ کر دیے جائیں گے۔ ان کے مطابق ایران کے پاس ابھی کچھ حد تک جنگ لڑنے کی صلاحیت موجود ہے، تاہم یہ صلاحیت بہت محدود رہ گئی ہے، جس کے باعث وہ بالآخر مذاکرات کی میز پر آنے پر مجبور ہو جائے گا۔

صدر ٹرمپ نے مزید بتایا کہ امریکا کے نمائندوں نے منگل کے روز ایرانی حکام کے ساتھ مذاکرات بھی کیے ہیں، تاہم انہوں نے ان مذاکرات کی تفصیلات یا ممکنہ نتائج سے متعلق مزید معلومات فراہم نہیں کیں۔

ٹرمپ کے حالیہ بیانات ایسے وقت میں سامنے آئے ہیں جب خطے میں کشیدگی برقرار ہے اور ایران و امریکا کے درمیان تعلقات عالمی توجہ کا مرکز بنے ہوئے ہیں۔