نئی آٹو پالیسی کا مسودہ منظرعام پر، ہائبرڈ گاڑیوں پر ڈیوٹی میں بڑی کمی کی تجویز

نئی آٹو پالیسی 2026-31 کا حتمی مسودہ منظرعام پر آگیا ہے، جس میں مختلف کیٹیگریز کی ہائبرڈ گاڑیوں کی درآمد پر ڈیوٹی مرحلہ وار کم کرنے کی تجاویز شامل کی گئی ہیں۔

دستاویز کے مطابق 1801 سی سی سے زائد ہائبرڈ گاڑیوں پر ڈیوٹی آئندہ 5 سال کے دوران مرحلہ وار کم کرکے 30 فیصد کرنے کی تجویز دی گئی ہے، جبکہ 1501 سے 1800 سی سی تک ہائبرڈ گاڑیوں پر ڈیوٹی مرحلہ وار کم کرکے 20 فیصد تک لانے کی تجویز ہے۔

اسی طرح 851 سے 1000 سی سی تک ہائبرڈ گاڑیوں پر ڈیوٹی مرحلہ وار کم کرکے 30 فیصد کرنے کی تجویز سامنے آئی ہے۔

مسودے میں 800 سی سی تک ہائبرڈ گاڑیوں پر موجودہ 50 فیصد ڈیوٹی کو مرحلہ وار کم کرکے 30 فیصد کرنے کی تجویز بھی شامل ہے۔

دستاویز کے مطابق ہائبرڈ ٹرک پر ڈیوٹی آئندہ 5 سال میں 30 فیصد سے کم کرکے 15 فیصد کی جاسکتی ہے، جبکہ ہائی لائٹ کمرشل گاڑیوں پر ڈیوٹی 60 فیصد سے کم کرکے 30 فیصد کرنے کی تجویز دی گئی ہے۔

اس کے علاوہ ہائبرڈ بسوں پر بھی آئندہ 5 سال میں ڈیوٹی 30 فیصد سے کم کرکے 15 فیصد کرنے کی تجویز سامنے آئی ہے۔

نئی آٹو پالیسی کے مسودے میں تجویز کردہ ٹیکس اور ڈیوٹی میں یہ کمی حتمی منظوری کے بعد ہی نافذ العمل ہوگی۔