سندھ حکومت ایچ آئی وی کے خلاف مؤثر اقدامات کر رہی ہے، مزید سی ڈی سی سینٹرز فعال کیے جا رہے ہیں: ڈاکٹر عذرا پیچوہو

(کراچی) وزیر صحت سندھ ڈاکٹر عذرا فضل پیچوہو نے کہا ہے کہ سندھ حکومت ایچ آئی وی کے خلاف مؤثر اقدامات کر رہی ہے اور بیماری کی بروقت تشخیص کے لیے اسکریننگ کے عمل کو مزید تیز کیا جا رہا ہے، جبکہ مزید سی ڈی سی سینٹرز بھی فعال کیے جا رہے ہیں۔

کراچی کے جناح پوسٹ گریجویٹ میڈیکل سینٹر (جے پی ایم سی) میں چوتھی انٹرنیشنل فیملی پلاننگ سمٹ کانفرنس کا انعقاد کیا گیا، جس کا عنوان "ماں رہے سلامت" تھا۔ تقریب سے خطاب کرتے ہوئے ڈاکٹر عذرا پیچوہو نے کہا کہ سندھ حکومت ماں اور بچے کی صحت کے تحفظ کے لیے مختلف منصوبوں پر کام کر رہی ہے اور خاندانی منصوبہ بندی کے شعبے میں سندھ ملک بھر میں نمایاں مقام رکھتا ہے۔

انہوں نے کہا کہ صوبے میں سی سیکشن (Cesarean Section) کی بڑھتی ہوئی شرح کے باعث زچگی سے متعلق اموات میں اضافہ ہو رہا ہے، جس پر قابو پانے کے لیے اقدامات کیے جا رہے ہیں۔ ان کا کہنا تھا کہ تیسرے سی سیکشن کے بعد خاندانی منصوبہ بندی کے مؤثر طریقوں پر سنجیدگی سے غور کیا جانا چاہیے تاکہ ماں کی صحت کو بہتر بنایا جا سکے۔

وزیر صحت سندھ نے بتایا کہ خواتین کو بہتر طبی سہولیات فراہم کرنے کے لیے ٹرانسپورٹ کی سہولت میں بہتری لائی جا رہی ہے، جبکہ مختلف علاقوں میں برتھ اسٹیشن سینٹرز بھی قائم کیے جا رہے ہیں تاکہ محفوظ زچگی کی سہولیات آسانی سے دستیاب ہوں۔

ایچ آئی وی سے متعلق گفتگو کرتے ہوئے ڈاکٹر عذرا پیچوہو نے کہا کہ سندھ حکومت اس بیماری کے پھیلاؤ کو روکنے کے لیے مؤثر حکمت عملی پر عمل پیرا ہے۔ انہوں نے کہا کہ مزید سی ڈی سی سینٹرز قائم کیے جا رہے ہیں اور زیادہ سے زیادہ اسکریننگ کے ذریعے مریضوں کی بروقت تشخیص کو یقینی بنایا جا رہا ہے، جس سے ایچ آئی وی پر قابو پانے میں مدد ملے گی۔

انہوں نے مزید کہا کہ حکومت سندھ سرکاری اسپتالوں میں طبی سہولیات کی بہتری اور عوام کو معیاری صحت کی خدمات فراہم کرنے کے لیے بھرپور اقدامات کر رہی ہے۔