اسلام آباد میں بلدیاتی انتخابات 2015 کے قانون کے تحت کرانے کا حکم، الیکشن کمیشن کا اہم فیصلہ

اسلام آباد:الیکشن کمیشن نے اسلام آباد میں بلدیاتی انتخابات 2015 کے قانون کے تحت کرانے کا حکم دے دیا۔ چیف الیکشن کمشنر کی سربراہی میں پانچ رکنی کمیشن نے بلدیاتی انتخابات میں تاخیر سے متعلق کیس کی سماعت کی۔

سماعت کے دوران وفاقی سیکریٹری داخلہ اور الیکشن کمیشن کے حکام کمیشن کے سامنے پیش ہوئے۔ اس موقع پر الیکشن کمیشن کے اسپیشل سیکریٹری ظفر اقبال ملک نے بریفنگ دیتے ہوئے بتایا کہ اسلام آباد میں اب تک چھ مرتبہ حلقہ بندیاں کی جاچکی ہیں، جبکہ چار مرتبہ بلدیاتی انتخابات کے شیڈول جاری کیے گئے۔

اسپیشل سیکریٹری کے مطابق بلدیاتی انتخابات کا آخری شیڈول 9 اکتوبر 2025 کو جاری کیا گیا تھا، جس کے تحت پولنگ فروری 2026 میں ہونا تھی، تاہم اس دوران حکومت کی جانب سے آرڈیننس جاری کردیا گیا۔

انہوں نے بتایا کہ الیکشن کمیشن نے متعلقہ ڈیٹا اور نقشے حاصل کرنے کے بعد حلقہ بندیوں کا عمل شروع کیا تھا، لیکن اسی دوران 6 ستمبر کو آرڈیننس کی مدت ختم ہوگئی۔

الیکشن کمیشن کے اس حکم کے بعد اسلام آباد میں بلدیاتی انتخابات کے انعقاد کے لیے 2015 کے قانون کو بنیاد بنایا جائے گا۔