امریکی شہریوں کو اپنی زندگیاں اور ٹیکس ’پرائی جنگ‘ کے لیے استعمال نہ ہونے دیں، اسماعیل بقائی

ایرانی وزارت خارجہ کے ترجمان اسماعیل بقائی نے امریکی شہریوں پر زور دیا ہے کہ وہ خود کو ایسی جنگ کا ایندھن نہ بننے دیں جو ان کے قومی مفادات کے بجائے کسی اور کے مفادات کے تحت لڑی جا رہی ہو۔

اسماعیل بقائی نے اپنے بیان میں ایران جنگ کے دوران امریکی شہریوں کو مالی مراعات دینے کی مبینہ تجویز پر سوال اٹھایا۔ انہوں نے کہا کہ اسرائیلی اخبار یروشلم پوسٹ میں جنگ کے لیے امریکی شہریوں کو مالی فوائد دینے کی تجویز سامنے آئی ہے۔

ایرانی ترجمان کے مطابق امریکی شہریوں کے طلبہ قرضے اور کریڈٹ کارڈ کے قرضے معاف کرنے کی تجویز دی گئی ہے۔ انہوں نے سوال کیا کہ کیا امریکی شہری اپنی زندگیوں اور مستقبل کو کسی اور کی جنگ کے لیے استعمال ہونے دیں گے؟

اسماعیل بقائی نے امریکی شہریوں کو مخاطب کرتے ہوئے کہا کہ وہ خود کو ایسی جنگ کا ایندھن نہ بننے دیں اور اپنی زندگیاں اور ٹیکس کسی اور کی جنگ کے لیے استعمال نہ ہونے دیں۔