امریکا سے پیغامات کا تبادلہ جاری، دھمکیوں کے سامنے نہیں جھکیں گے: عباس عراقچی

(بشکیک) ایران کے وزیر خارجہ عباس عراقچی نے کہا ہے کہ امریکا کے ساتھ پیغامات کا تبادلہ جاری ہے اور اس سلسلے میں ثالثی کا کوئی مسئلہ نہیں، تاہم ایران دھمکی، دباؤ اور طاقت کی زبان ہرگز قبول نہیں کرے گا۔

کرغزستان میں شنگھائی تعاون تنظیم (SCO) کے وزرائے خارجہ اجلاس سے خطاب کرتے ہوئے عباس عراقچی نے کہا کہ امریکا کا دھمکی آمیز اور دباؤ پر مبنی رویہ ناقابل قبول ہے۔ انہوں نے واضح کیا کہ ایران کسی بھی قسم کے دباؤ کے سامنے نہیں جھکے گا اور اپنے قومی مفادات پر کسی صورت سمجھوتہ نہیں کرے گا۔

ایرانی وزیر خارجہ نے کہا کہ ایران اپنے مؤقف سے پیچھے ہٹنے والا نہیں اور آبنائے ہرمز میں اپنے حقوق کا ہر قیمت پر تحفظ کرے گا۔ ان کے مطابق ایران اس وقت تک جنگ بندی پر آمادہ نہیں ہوگا جب تک آبنائے ہرمز سے متعلق اس کے مطالبات پورے نہیں کیے جاتے۔

عباس عراقچی نے خبردار کیا کہ ایران کے خلاف کسی بھی جارحیت میں شریک یا معاون ممالک کو اس کے نتائج بھگتنا ہوں گے۔ انہوں نے کہا کہ ایران کے خلاف استعمال ہونے والی کسی بھی سرزمین کو جائز ہدف تصور کیا جائے گا۔

انہوں نے کہا کہ ایرانی قوم کے خلاف ہونے والی ہر جارحیت کا بھرپور جواب دیا جائے گا اور شنگھائی تعاون تنظیم کو ایران کی خودمختاری اور علاقائی سالمیت کے دفاع میں مؤثر آواز بننا چاہیے۔

ایرانی وزیر خارجہ کا کہنا تھا کہ عالمی قوانین اور ریاستوں کی خودمختاری کا احترام علاقائی اور عالمی امن کے لیے ناگزیر ہے، جبکہ رکن ممالک کو امریکی جارحیت کے خلاف مشترکہ مؤقف اختیار کرنا چاہیے۔

انہوں نے مزید کہا کہ ایران نے کبھی کسی جنگ کا آغاز نہیں کیا، مشرق وسطیٰ میں پائیدار امن صرف باہمی احترام، تعاون اور دوہرے معیار کے خاتمے سے ہی ممکن ہے۔ ان کا کہنا تھا کہ آبنائے ہرمز کے معاملات میں بیرونی مداخلت آبی گزرگاہ کی سلامتی کو نقصان پہنچا رہی ہے، جبکہ ایران اپنے خلاف کسی بھی جارحیت کا جواب دینے کا حق محفوظ رکھتا ہے۔