فیلڈ مارشل عاصم منیر کی ہارورڈ بزنس سکول کے طلبہ سے ملاقات

چیف آف ڈیفنس فورسز فیلڈ مارشل سید عاصم منیر نے کہا ہے کہ موجودہ غیر یقینی اور تیزی سے بدلتی ہوئی دنیا میں نوجوانوں کو حقائق پر مبنی تجزیاتی صلاحیت کو فروغ دینا ہوگا تاکہ وہ سوشل میڈیا اور پروپیگنڈے کے بڑھتے ہوئے اثرات کے باوجود درست اور بامعنی فیصلے کر سکیں۔

پاک فوج کے شعبہ تعلقات عامہ کے مطابق چیف آف ڈیفنس فورسز فیلڈ مارشل سید عاصم منیر نے پاکستان کے دورے پر آئے ہارورڈ بزنس سکول کے طلبہ کے ایک وفد سے ملاقات کی۔ وفد میں مختلف ممالک سے تعلق رکھنے والے طلبہ شامل تھے۔

ملاقات کے دوران علاقائی اور عالمی صورتحال، پاکستان کی سکیورٹی کی صورتحال اور خطے سمیت دنیا بھر میں امن، استحکام اور خوشحالی کے فروغ کے لیے جاری کوششوں پر تبادلہ خیال کیا گیا۔

فیلڈ مارشل سید عاصم منیر نے نوجوانوں کی تعلیم، ہنر مندی اور کاروباری صلاحیتوں کی اہمیت پر زور دیتے ہوئے کہا کہ نوجوانوں کو حقائق پر مبنی تجزیے کی عادت اپنانی چاہیے۔ انہوں نے کہا کہ آج کی دنیا بڑھتی ہوئی بے یقینی کے ساتھ ساتھ سوشل میڈیا اور مختلف قسم کے پروپیگنڈے سے بھی متاثر ہو رہی ہے، ایسے میں درست معلومات اور حقائق کی بنیاد پر سوچنا انتہائی ضروری ہے۔

ہارورڈ بزنس سکول کے طلبہ نے اپنے دورۂ پاکستان کے دوران حاصل ہونے والے مثبت تجربات کا اظہار کیا۔ وفد کے اراکین نے بالخصوص پاکستانی عوام کی کشادہ دلی، گرمجوشی اور مہمان نوازی کو سراہا۔

طلبہ نے پاکستان میں موجود بے پناہ صلاحیتوں اور مختلف شعبوں میں دستیاب مواقع کو بھی اجاگر کرتے ہوئے اپنے دورے کو ایک مثبت اور مفید تجربہ قرار دیا۔