دہشت گردی کے مکمل خاتمے تک کارروائیاں جاری رہیں گی، فیلڈ مارشل عاصم منیر

راولپنڈی: فیلڈ مارشل سید عاصم منیر نے کہا ہے کہ دہشت گردی اور اس کے سہولت کاروں کے مکمل خاتمے تک سیکیورٹی فورسز کی کارروائیاں بلا تعطل جاری رہیں گی اور پاکستان کے امن و استحکام کے خلاف سرگرم ہر دہشت گرد نیٹ ورک کا خاتمہ یقینی بنایا جائے گا۔

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر سے جنرل ہیڈکوارٹرز (جی ایچ کیو) میں 20ویں نیشنل ورکشاپ بلوچستان کے شرکاء نے ملاقات کی، جس میں قومی سلامتی، بلوچستان کی مجموعی صورتحال، امن و امان اور ترقیاتی اقدامات پر تفصیلی تبادلہ خیال کیا گیا۔

فیلڈ مارشل نے کہا کہ سیکیورٹی فورسز، قانون نافذ کرنے والے اداروں اور عوام کی مشترکہ کوششوں سے بلوچستان میں پائیدار امن کا قیام ممکن ہوگا۔ انہوں نے کہا کہ فتنہ الخوارج اور فتنہ الہندوستان کے خلاف ہدفی کارروائیاں مکمل عزم کے ساتھ جاری ہیں اور دہشت گردی کے مکمل خاتمے تک یہ سلسلہ رکے گا نہیں۔

انہوں نے واضح کیا کہ پاکستان اور اس کے عوام کے لیے خطرہ بننے والے دہشت گرد نیٹ ورکس کے خلاف ہر ممکن کارروائی کی جائے گی۔ ان کے مطابق بیرونی سرپرستی میں سرگرم پراکسی عناصر بلوچستان میں بدامنی اور عدم استحکام پیدا کرنے کی کوشش کر رہے ہیں، تاہم مسلح افواج اور عوام کے اتحاد اور استقامت سے دشمن کے تمام مذموم عزائم ناکام بنائے جائیں گے۔

فیلڈ مارشل عاصم منیر نے بلوچستان کو پاکستان کا فخر اور قدرتی وسائل سے مالا مال صوبہ قرار دیتے ہوئے کہا کہ صوبے کے محب وطن، باصلاحیت اور ثابت قدم عوام بلوچستان کی سب سے بڑی طاقت ہیں۔

انہوں نے کہا کہ وفاقی اور صوبائی حکومتوں کے ترقیاتی منصوبے عوامی ضروریات کو مدنظر رکھتے ہوئے بلوچستان کی سماجی اور معاشی ترقی کے لیے جاری ہیں۔ انہوں نے قومی یکجہتی کے فروغ میں سول سوسائٹی، جامعات، میڈیا اور نوجوانوں کے مثبت کردار کو بھی سراہا۔

فیلڈ مارشل نے اس عزم کا اظہار کیا کہ پاکستان کے روشن مستقبل کے لیے قومی اتحاد، استقامت اور مشترکہ کوششیں ناگزیر ہیں۔ ملاقات کے اختتام پر شرکاء نے پاکستان کے استحکام، ترقی اور خودمختاری کے لیے اپنے مشترکہ عزم کا اعادہ بھی کیا۔