وزیر خزانہ محمد اورنگزیب کی ڈی ایف سی کو توانائی، آئی ٹی، معدنیات اور انفراسٹرکچر میں سرمایہ کاری کی دعوت

(واشنگٹن) وفاقی وزیر خزانہ و محصولات سینیٹر محمد اورنگزیب نے امریکی یو ایس انٹرنیشنل ڈویلپمنٹ فنانس کارپوریشن (DFC) کے نمائندوں سے ملاقات کرتے ہوئے پاکستان کے ترجیحی شعبوں میں سرمایہ کاری اور ترقیاتی تعاون بڑھانے پر زور دیا ہے۔

وزیر خزانہ نے کہا کہ حکومت پاکستان توانائی، انفارمیشن ٹیکنالوجی، انفراسٹرکچر، معدنیات، خوراک اور زراعت سمیت اہم شعبوں میں ڈی ایف سی کے بھرپور تعاون کی خواہاں ہے، کیونکہ یہ شعبے ملکی معاشی ترقی اور پائیدار سرمایہ کاری کے لیے کلیدی حیثیت رکھتے ہیں

محمد اورنگزیب نے ڈی ایف سی کی جانب سے بندرگاہوں، ٹیلی کمیونیکیشن، آئی ٹی، توانائی، معدنیات، دواسازی، مینوفیکچرنگ اور سپلائی چین کی بہتری جیسے شعبوں پر خصوصی توجہ کا خیرمقدم کرتے ہوئے کہا کہ یہ ترجیحات حکومت پاکستان کے معاشی اصلاحاتی ایجنڈے اور ترقیاتی منصوبوں سے مکمل مطابقت رکھتی ہیں۔

وزیر خزانہ نے ڈی ایف سی کی ٹیم کو پاکستان کا دورہ کرنے کی دعوت دیتے ہوئے کہا کہ وہ متعلقہ وزارتوں، سرمایہ کاروں اور دیگر شراکت داروں کے ساتھ مل کر قابلِ عمل منصوبوں کی نشاندہی کرے اور ان کے لیے جامع بزنس پلان تیار کیا جائے تاکہ امریکی سرمایہ کاری کو عملی شکل دی جا سکے۔

ملاقات میں پاکستان میں نجی شعبے کی سرمایہ کاری، بنیادی ڈھانچے کی بہتری، روزگار کے نئے مواقع پیدا کرنے اور معاشی ترقی کو تیز کرنے کے امکانات پر بھی تبادلہ خیال کیا گیا۔ وزیر خزانہ نے اس عزم کا اظہار کیا کہ حکومت سرمایہ کاروں کو سازگار ماحول فراہم کرنے اور اصلاحاتی عمل کو مزید آگے بڑھانے کے لیے پرعزم ہے۔