یوکرین کی سابق سفیر اولہا اسٹیفانیشینا پر کرپشن الزامات، ناجائز اثاثوں کے کیس میں فردِ جرم عائد

یوکرین کی سابق سفیر برائے امریکا اور سابق نائب وزیراعظم اولہا اسٹیفانیشینا کے خلاف ناجائز اثاثے بنانے، مالی بے ضابطگیوں اور اختیارات کے مبینہ ناجائز استعمال کے الزامات کے تحت باضابطہ فردِ جرم عائد کر دی گئی ہے۔

عالمی خبر رساں اداروں کے مطابق یوکرین کی خصوصی انسدادِ بدعنوانی استغاثہ نے ہائی اینٹی کرپشن کورٹ میں مقدمہ دائر کیا، جہاں ان کی عبوری ضمانت اور دیگر قانونی پابندیوں سے متعلق سماعت جاری ہے۔

استغاثہ نے عدالت سے درخواست کی ہے کہ اولہا اسٹیفانیشینا کی رہائی کو ایک کروڑ 30 لاکھ ہریونیا، یعنی تقریباً دو لاکھ 90 ہزار امریکی ڈالر کے ضمانتی مچلکوں سے مشروط کیا جائے۔

پراسیکیوٹرز کے مطابق سابق سفیر نے اپنے اثاثوں کے گوشواروں میں دو رہائشی اپارٹمنٹس، ان کی تزئین و آرائش کے اخراجات، والدہ کے علاج، ہوائی سفر، کرائے کے فلیٹ کے اخراجات اور ایک ماتحت افسر کے نام پر رجسٹرڈ مرسڈیز گاڑی کو ظاہر نہیں کیا۔

استغاثہ کا کہنا ہے کہ گزشتہ ڈیڑھ سال کے دوران ان کے حاصل کردہ اثاثوں کی مجموعی مالیت ایک کروڑ 39 لاکھ ہریونیا، یعنی تقریباً تین لاکھ 10 ہزار امریکی ڈالر رہی، جبکہ ان کے اخراجات ان کی آمدنی اور دستیاب مالی وسائل سے کہیں زیادہ تھے۔

عدالتی دستاویزات میں یہ الزام بھی شامل ہے کہ اولہا اسٹیفانیشینا نے 2024 میں نیشنل ایجنسی فار پریوینشن آف کرپشن کے سربراہ کے انتخابی عمل پر اثرانداز ہونے کی کوشش کی۔ پراسیکیوشن کے مطابق انہوں نے حکومتی حمایت یافتہ سلیکشن پینل کے بعض ارکان کو مخصوص امیدواروں کی حمایت کی ہدایات دیں، جبکہ ایک امیدوار اولیکسینڈر سکوماروف کو کم نمبر دینے کی بھی مبینہ ہدایت کی تاکہ وہ انتخابی دوڑ سے باہر ہو جائیں۔ مزید یہ کہ بعض اثاثے دوسرے افراد کے نام پر رکھنے کا بھی الزام عائد کیا گیا ہے۔

دوسری جانب اولہا اسٹیفانیشینا نے تمام الزامات مسترد کرتے ہوئے فیس بک پر جاری اپنے بیان میں کہا کہ قانون نافذ کرنے والے اداروں کی کارروائیاں کسی شخص کے جرم کا ثبوت نہیں ہوتیں۔ ان کا کہنا تھا کہ وہ عدالت میں قانونی طریقے سے اپنا دفاع کریں گی۔

انہوں نے مزید کہا کہ جائیداد سے متعلق اٹھائے گئے سوالات پر وہ پہلے ہی میڈیا کو تمام ضروری دستاویزات فراہم کر چکی ہیں، جبکہ الزامات ثابت کرنا استغاثہ کی ذمہ داری ہے۔

یاد رہے کہ یوکرین کے صدر وولودیمیر زیلنسکی نے کرپشن الزامات سامنے آنے کے بعد 3 اگست کو اولہا اسٹیفانیشینا کو امریکا میں سفیر کے عہدے سے برطرف کر دیا تھا۔ ان کے خلاف اس سے قبل بھی اثاثہ جات کی بازیابی سے متعلق ادارے اور سرکاری فنڈز میں مبینہ بے ضابطگیوں کے مقدمات میں تحقیقات جاری رہی ہیں۔

یوکرینی میڈیا کے مطابق ان کے سابق شوہر سے منسلک کمپنیوں کو ضبط شدہ اثاثوں کے انتظام کے ٹھیکے ملنے پر بھی سوالات اٹھائے گئے تھے، جبکہ 2019 میں بھی ان پر سرکاری فنڈز میں مبینہ خرد برد کے ایک علیحدہ مقدمے میں فردِ جرم عائد کی جا چکی تھی۔

ہائی اینٹی کرپشن کورٹ آئندہ سماعت میں ان کی ضمانت، ممکنہ سفری پابندیوں اور مقدمے کی مزید کارروائی سے متعلق فیصلہ کرے گی۔