فرانس نے سفارتی اہلکاروں کی حراست پر ایران کو سنگین نتائج کی وارننگ دے دی

(پیرس) ایران میں فرانسیسی سفارت خانے کے دو اہلکاروں کو حراست میں لیے جانے کے واقعے پر فرانس نے سخت ردعمل دیتے ہوئے تہران کو سنگین نتائج کی وارننگ جاری کر دی ہے۔

فرانس کے وزیر خارجہ ژاں نوئل بارو نے اپنے بیان میں کہا کہ تہران میں فرانسیسی سفارت خانے کے دو اہلکاروں کو ایرانی سکیورٹی اداروں نے کئی گھنٹوں تک حراست میں رکھا، جو سفارتی استثنیٰ کی کھلی خلاف ورزی اور انتہائی سنگین واقعہ ہے۔

انہوں نے سماجی رابطے کی ویب سائٹ ایکس پر جاری بیان میں کہا کہ فرانسیسی سفارتی عملہ ایرانی حکام کی جانب سے شدید ہراسانی کا نشانہ بنا، جسے کسی صورت قبول نہیں کیا جا سکتا۔

فرانسیسی وزیر خارجہ نے مزید کہا کہ انہوں نے اپنے ایرانی ہم منصب کو واضح طور پر آگاہ کر دیا ہے کہ فرانسیسی سفارتی اہلکاروں کی سلامتی اور سفارتی استثنیٰ کی اس سنگین خلاف ورزی کو بغیر نتائج کے نہیں چھوڑا جائے گا۔

فرانس نے مطالبہ کیا ہے کہ بین الاقوامی سفارتی قوانین کا احترام یقینی بنایا جائے اور آئندہ ایسے واقعات کی روک تھام کے لیے ضروری اقدامات کیے جائیں۔