گلگت بلتستان کی نئی حکومت کے ساتھ مل کر کام کرنے کے لیے پرعزم ہیں، وزیراعظم شہباز شریف

اسلام آباد: وزیراعظم شہباز شریف نے کہا ہے کہ وفاقی حکومت گلگت بلتستان کے عوام کی فلاح و بہبود اور ترقی کے لیے نو منتخب حکومت کے ساتھ مل کر کام کرنے کے لیے پرعزم ہے۔

وزیراعظم شہباز شریف سے وزیراعلیٰ گلگت بلتستان امجد حسین نے ملاقات کی، جس میں گلگت بلتستان سے متعلق مختلف امور، ترقیاتی منصوبوں اور عوامی فلاح کے اقدامات پر تفصیلی تبادلہ خیال کیا گیا۔

وزیراعظم نے امجد حسین کو وزیراعلیٰ گلگت بلتستان کا عہدہ سنبھالنے پر مبارکباد دیتے ہوئے کہا کہ وفاقی حکومت خطے کی ترقی اور عوام کی خوشحالی کے لیے ہر ممکن تعاون فراہم کرے گی۔

انہوں نے کہا کہ حکومت قابلِ تجدید توانائی، سیاحت، انفراسٹرکچر، صحت، تعلیم اور دیگر اہم شعبوں میں متعدد ترقیاتی منصوبوں پر کام کر رہی ہے تاکہ گلگت بلتستان میں پائیدار ترقی کو فروغ دیا جا سکے۔

وزیراعظم نے بتایا کہ وفاقی حکومت کے اہم منصوبوں میں 100 میگاواٹ شمسی توانائی منصوبہ، دانش اسکولوں کا قیام اور عوام کو جدید سرکاری سہولیات کی فراہمی کے لیے گلگت میں پاکستان آسان خدمت سینٹر کے قیام کی منصوبہ بندی شامل ہے۔

ملاقات میں نائب وزیراعظم و وزیر خارجہ اسحاق ڈار، وفاقی وزیر منصوبہ بندی احسن اقبال اور وفاقی وزیر اقتصادی امور احد خان چیمہ بھی شریک تھے۔