بھارت میں جین زی کی بغاوت، مودی حکومت کو تیسری مدت میں بڑا سیاسی چیلنج درپیش

نئی دہلی: بھارت میں نوجوانوں کی قیادت میں جاری احتجاجی تحریک نے وزیراعظم نریندر مودی کی حکومت کے لیے ایک نیا اور بڑا سیاسی چیلنج کھڑا کر دیا ہے۔ تجزیہ کاروں کے مطابق جنریشن زی (Gen Z) کی بڑھتی ہوئی مزاحمت نے حکومت پر عوامی دباؤ میں نمایاں اضافہ کر دیا ہے۔

رپورٹس کے مطابق 'کاکروچ جنتا پارٹی' کے پلیٹ فارم سے شروع ہونے والی احتجاجی تحریک نے ملک بھر میں نوجوانوں کو متحرک کر دیا ہے، جبکہ سماجی کارکن سونم وانگچک کی بھوک ہڑتال اور جبری منتقلی کے واقعات نے بھی احتجاج کو مزید تقویت دی ہے۔

برطانوی خبر رساں ادارے کے مطابق مودی حکومت کی تیسری مدت میں یہ اب تک کا سب سے بڑا عوامی دباؤ تصور کیا جا رہا ہے۔ مظاہرین کا کہنا ہے کہ امتحانی اسکینڈلز، بڑھتی ہوئی بے روزگاری، تعلیمی نظام پر اعتماد کے فقدان اور نوجوانوں کے لیے محدود مواقع ان کے احتجاج کی بنیادی وجوہات ہیں۔

پارلیمنٹ کی جانب مارچ کے دوران مظاہرین اور سکیورٹی فورسز کے درمیان جھڑپیں بھی ہوئیں، جس کے بعد دارالحکومت نئی دہلی میں صورتحال کشیدہ ہوگئی۔

سرکاری اعداد و شمار کے مطابق تصادم میں کم از کم 180 افراد زخمی ہوئے، جن میں 118 پولیس اہلکار اور 60 مظاہرین شامل ہیں، جبکہ امن و امان کی صورتحال برقرار رکھنے کے لیے شہر کے حساس علاقوں میں موبائل انٹرنیٹ سروس بھی معطل کر دی گئی۔

مظاہرین کا بنیادی مطالبہ وفاقی وزیر تعلیم کے استعفے کا ہے۔ احتجاجی تحریک کی قیادت زیادہ تر نوجوانوں کے ہاتھ میں ہے، جسے وسیع پیمانے پر جنریشن زی کی آواز قرار دیا جا رہا ہے۔

ڈی ڈبلیو کے مطابق یہ تحریک ابتدا میں سوشل میڈیا پر ایک طنزیہ آن لائن مہم کے طور پر شروع ہوئی تھی، تاہم وقت گزرنے کے ساتھ یہ ملک گیر منظم احتجاج میں تبدیل ہوگئی۔ مبصرین کا کہنا ہے کہ یہ احتجاج بھارت میں نوجوانوں کے اندر بڑھتی ہوئی بے چینی، روزگار کے بحران اور تعلیمی مسائل کی عکاسی کرتا ہے۔

سیاسی تجزیہ کاروں کے مطابق اگر حکومت نوجوانوں کے مطالبات پر مؤثر پیش رفت نہ کر سکی تو یہ تحریک مستقبل میں بھارتی سیاست پر مزید گہرے اثرات مرتب کر سکتی ہے۔