نورین نیازی کے بیانات ان کی ذاتی رائے ہیں، پارٹی پالیسی نہیں: بیرسٹر گوہر

(راولپنڈی)چیئرمین پاکستان تحریک انصاف بیرسٹر گوہر نے واضح کیا ہے کہ نورین نیازی کی جانب سے دیے گئے حالیہ بیانات ان کی ذاتی رائے ہیں اور انہیں پارٹی کی پالیسی یا مؤقف نہیں سمجھا جانا چاہیے۔

اڈیالہ جیل کے باہر میڈیا سے گفتگو کرتے ہوئے بیرسٹر گوہر نے کہا کہ اللہ کے کرم سے معرکۂ حق میں کامیابی حاصل ہوئی ہے، تاہم اگر کوئی دشمن دوبارہ جارحیت کی کوشش کرے گا تو اسے پہلے سے بھی زیادہ مؤثر جواب دیا جائے گا۔

انہوں نے کہا کہ پاکستان کا دفاع مضبوط ہاتھوں میں ہے اور کوئی بھی دشمن ملک کو شکست نہیں دے سکتا۔ ان کا کہنا تھا کہ فوج کی قربانیوں اور شہداء کے بارے میں غیر ذمہ دارانہ گفتگو سے گریز کیا جانا چاہیے۔

بیرسٹر گوہر نے دہشت گردی کو ملک کے لیے ایک بڑا ناسور قرار دیتے ہوئے کہا کہ اس کے خاتمے سے ہی پاکستان میں ترقی، امن اور استحکام کی راہ ہموار ہوگی۔

انہوں نے اس بات پر بھی زور دیا کہ ملک کو درپیش سیاسی مسائل کا مستقل اور پائیدار حل سیاسی مذاکرات اور جمہوری عمل کے ذریعے تلاش کیا جانا چاہیے تاکہ پاکستان موجودہ چیلنجز سے نکل کر استحکام کی جانب بڑھ سکے۔