سونے کی قیمتوں میں کمی کا سلسلہ جاری، فی تولہ سونا 4 لاکھ 65 ہزار 336 روپے کا ہوگیا

کراچی: ملک میں سونے کی قیمتوں میں کمی کا سلسلہ جاری ہے اور آج بھی فی تولہ سونے کی قیمت میں 800 روپے کی کمی ریکارڈ کی گئی ہے۔

آل پاکستان صرافہ جیمز اینڈ جیولرز ایسوسی ایشن کے مطابق کمی کے بعد ملک میں فی تولہ سونے کی نئی قیمت 4 لاکھ 65 ہزار 336 روپے ہوگئی ہے۔

اسی طرح 10 گرام سونے کی قیمت میں بھی 686 روپے کی کمی ہوئی، جس کے بعد نئی قیمت 3 لاکھ 98 ہزار 950 روپے ہوگئی۔

واضح رہے کہ گزشتہ روز بھی فی تولہ سونے کی قیمت میں 1800 روپے کی نمایاں کمی ریکارڈ کی گئی تھی، جس کے بعد مقامی مارکیٹ میں سونے کی قیمتوں میں کمی کا رجحان برقرار ہے۔

دوسری جانب چاندی کی قیمت میں بھی کمی دیکھنے میں آئی ہے۔ فی تولہ چاندی 50 روپے سستی ہونے کے بعد 7 ہزار 129 روپے ہوگئی، جبکہ 10 گرام چاندی کی قیمت 43 روپے کمی کے بعد 6 ہزار 111 روپے ریکارڈ کی گئی۔

بین الاقوامی مارکیٹ میں بھی سونے کی قیمت میں کمی ہوئی، جہاں فی اونس سونا 8 ڈالر سستا ہوکر 4 ہزار 428 ڈالر کا ہوگیا۔ عالمی مارکیٹ میں چاندی کی قیمت بھی 50 سینٹ کمی کے بعد 66.50 ڈالر فی اونس ریکارڈ کی گئی۔

ماہرین کے مطابق اگر عالمی مارکیٹ میں سونے کی قیمتوں میں کمی کا رجحان برقرار رہا تو پاکستان کی مقامی مارکیٹ میں بھی سونا مزید سستا ہونے کا امکان ہے۔