خیبر پختونخوا پولیس کی تنخواہوں میں اضافے کا اعلان، شہداء پیکج بھی بڑھا دیا گیا

پشاور: گورنر خیبر پختونخوا فیصل کریم کنڈی نے صوبائی پولیس کے شہداء پیکج اور دورانِ ڈیوٹی زخمی ہونے والے اہلکاروں کے معاوضے میں اضافے کا اعلان کردیا ہے۔ نئے پیکج کے تحت مختلف رینکس کے شہداء کے ورثاء کے لیے معاوضے کی رقم بڑھا دی گئی ہے، جبکہ پلاٹ کے بجائے نقد مالی معاونت فراہم کرنے کا فیصلہ بھی کیا گیا ہے۔

گورنر فیصل کریم کنڈی کے مطابق کانسٹیبل سے انسپکٹر تک کے شہداء کا معاوضہ ایک کروڑ 10 لاکھ روپے سے بڑھا کر ایک کروڑ 70 لاکھ روپے کردیا گیا ہے۔ اسی طرح ڈی ایس پی اور اے ایس پی رینک کے شہداء کا معاوضہ ایک کروڑ 60 لاکھ روپے سے بڑھا کر ڈھائی کروڑ روپے مقرر کیا گیا ہے۔

مختلف رینکس کے پولیس شہداء کے معاوضے میں اضافہ

گورنر کے اعلان کے مطابق گریڈ 18 اور 19 کے پولیس شہداء کا معاوضہ 2 کروڑ 10 لاکھ روپے سے بڑھا کر 3 کروڑ روپے کردیا گیا ہے، جبکہ گریڈ 20 اور اس سے اوپر کے شہداء کے لیے یہ رقم 2 کروڑ 10 لاکھ روپے سے بڑھا کر ساڑھے 3 کروڑ روپے مقرر کی گئی ہے۔

زخمی اور مستقل معذور اہلکاروں کے لیے نیا پیکج

فیصل کریم کنڈی کے مطابق دورانِ ڈیوٹی زخمی ہونے والے پولیس اہلکاروں کا معاوضہ ایک لاکھ روپے سے بڑھا کر 15 لاکھ روپے کردیا گیا ہے، جبکہ مستقل معذوری کی صورت میں 50 لاکھ روپے فراہم کرنے کی منظوری دی گئی ہے۔

اس اقدام کا مقصد دورانِ ڈیوٹی زخمی ہونے والے اہلکاروں اور ان کے خاندانوں کو مالی معاونت فراہم کرنا ہے۔

شہداء کے ورثاء کو پلاٹ کے بجائے نقد رقم ملے گی

گورنر خیبر پختونخوا نے بتایا کہ کانسٹیبل سے انسپکٹر تک کے پولیس شہداء کے ورثاء کو 5 مرلہ پلاٹ دینے کے بجائے ایک کروڑ 80 لاکھ روپے فراہم کیے جائیں گے۔

اسی طرح ڈی ایس پی اور اے ایس پی رینک کے شہداء کے ورثاء کے لیے رہائشی معاونت کی مد میں ڈھائی کروڑ روپے منظور کیے گئے ہیں۔

اعلان کے مطابق گریڈ 20 اور اس سے اوپر کے پولیس شہداء کے ورثاء کو پلاٹ کے بجائے 7 کروڑ روپے دیے جائیں گے۔

فیصل کریم کنڈی نے مزید بتایا کہ پولیس اہلکاروں کی شریکِ حیات یا بچوں کی وفات کی صورت میں بھی 50 لاکھ روپے فراہم کیے جائیں گے۔

گورنر کے مطابق ان اقدامات کے ذریعے پولیس اہلکاروں اور ان کے خاندانوں کو مالی تحفظ فراہم کرنے کے لیے معاوضوں اور معاونتی پیکج میں اضافہ کیا گیا ہے۔