ہرمن پریت کور نے بھارتی ویمنز کرکٹ ٹیم کی کپتانی سے استعفیٰ دے دیا

بھارتی ویمنز کرکٹ ٹیم کی کپتان ہرمن پریت کور نے تمام فارمیٹس کی قیادت سے استعفیٰ دے دیا۔ ان کی کپتانی میں بھارت نے 2025 ورلڈکپ اور 2026 ایشیا کپ سمیت اہم کامیابیاں حاصل کیں
ممبئی: بھارتی ویمنز کرکٹ ٹیم کی کپتان ہرمن پریت کور نے تمام فارمیٹس میں ٹیم کی قیادت سے استعفیٰ دے دیا۔
سوشل میڈیا پر جاری اپنے بیان میں ہرمن پریت کور نے کہا کہ کپتانی سے دستبردار ہونا آسان فیصلہ نہیں تھا، کیونکہ اس سفر سے کئی برسوں کی یادیں، جذبات اور قربانیاں وابستہ ہیں۔
ہرمن پریت کور کے مطابق کپتانی کے دوران انہیں اپنی ذاتی کارکردگی، ترقی اور کئی ذاتی خواہشات کو پسِ پشت ڈالنا پڑا۔ انہوں نے اپنے دورِ قیادت کو یادگار قرار دیتے ہوئے ٹیم اور ساتھی کھلاڑیوں کے ساتھ گزرے وقت کو سراہا۔
ہرمن پریت کور کی قیادت میں اہم کامیابیاںہرمن پریت کور کی قیادت میں بھارتی ویمنز ٹیم نے کئی اہم کامیابیاں حاصل کیں۔ ان کی کپتانی میں بھارت نے 2025 کا ورلڈکپ اور 2026 کا ایشیا کپ جیتا، جبکہ ایشین گیمز میں مسلسل دو گولڈ میڈلز بھی اپنے نام کیے۔

ان کی قیادت میں بھارتی ٹیم نے پہلی مرتبہ آسٹریلیا کو ٹیسٹ میچ میں شکست دینے کا اعزاز حاصل کیا۔
بھارتی ٹیم نے ہرمن پریت کور کی کپتانی میں 1999 کے بعد پہلی مرتبہ انگلینڈ میں دو طرفہ سیریز بھی جیتی۔
سمرتی مندھانا نئی کپتان کی امیدوارہرمن پریت کور کے استعفے کے بعد بھارتی ویمنز کرکٹ ٹیم کی نئی کپتان کے لیے سمرتی مندھانا کو مضبوط امیدوار قرار دیا جا رہا ہے۔
تاہم نئی کپتان کے حوالے سے حتمی فیصلہ بھارتی کرکٹ بورڈ کی جانب سے کیا جائے گا۔

شائع ہوا: 6 اکتوبر، 2026 کو 08:09 AM
آخری تدوین: 7 اکتوبر، 2026



