آئی ایم ایف کی پیشگوئی: پاکستان کی معاشی ترقی ہدف سے کم رہنے کا امکان، 2026 میں مہنگائی بڑھنے کی وارننگ

بین الاقوامی مالیاتی فنڈ (آئی ایم ایف) نے اپنی تازہ ورلڈ اکنامک آؤٹ لک رپورٹ جاری کرتے ہوئے پیشگوئی کی ہے کہ پاکستان کی معیشت رواں مالی سال بھی حکومتی ہدف حاصل نہیں کر سکے گی اور شرح نمو 3.6 فیصد تک محدود رہنے کا امکان ہے۔

رپورٹ کے مطابق حکومت نے مالی سال کے لیے مجموعی قومی پیداوار (جی ڈی پی) کی شرح نمو کا ہدف 4 فیصد مقرر کیا ہے، تاہم آئی ایم ایف نے اپنی اپریل میں جاری کردہ پیشگوئی برقرار رکھتے ہوئے کہا ہے کہ معاشی ترقی 3.6 فیصد رہنے کی توقع ہے۔

آئی ایم ایف نے خبردار کیا ہے کہ 2026 کے دوران پاکستان سمیت دنیا بھر میں مہنگائی میں اضافے کا امکان موجود ہے۔ رپورٹ میں کہا گیا ہے کہ مشرق وسطیٰ میں جاری کشیدگی اور جنگ کے باعث تیل سمیت دیگر بنیادی اشیا کی قیمتوں میں اتار چڑھاؤ آ سکتا ہے، جس کے عالمی معیشت پر اثرات مرتب ہوں گے۔

رپورٹ کے مطابق پاکستان میں 2026 کے دوران مہنگائی کی اوسط شرح 8.4 فیصد رہنے کا امکان ظاہر کیا گیا ہے، جبکہ عالمی سپلائی چین کو بھی مختلف جغرافیائی اور سیاسی عوامل کے باعث خطرات لاحق رہیں گے۔

آئی ایم ایف نے حکومتوں پر زور دیا ہے کہ وہ معاشی اصلاحات کی رفتار تیز کریں تاکہ عالمی غیر یقینی صورتحال کے اثرات کو کم کیا جا سکے۔

رپورٹ میں عالمی معیشت سے متعلق پیشگوئی کرتے ہوئے کہا گیا ہے کہ 2026 میں عالمی معاشی ترقی کی شرح 3 فیصد رہنے کی توقع ہے، جو 2027 میں بڑھ کر 3.4 فیصد ہو سکتی ہے۔

آئی ایم ایف کے مطابق مشرق وسطیٰ میں جاری تنازعات عالمی معیشت کے لیے ایک بڑا خطرہ ہیں، تاہم مصنوعی ذہانت (AI) اور جدید ٹیکنالوجی میں پیش رفت کئی ممالک کی اقتصادی ترقی میں معاون ثابت ہو سکتی ہے۔