اسلام آباد ہائیکورٹ کا عمران خان اور بشریٰ بی بی کو قیدِ تنہائی میں نہ رکھنے کا حکم

اسلام آباد: اسلام آباد ہائیکورٹ نے بانی پاکستان تحریک انصاف (پی ٹی آئی) عمران خان اور ان کی اہلیہ بشریٰ بی بی کو جیل میں مبینہ طور پر قیدِ تنہائی میں رکھنے کے خلاف دائر درخواستوں کا فیصلہ ہدایات کے ساتھ نمٹا دیا۔

اسلام آباد ہائیکورٹ کے جسٹس خادم حسین سومرو نے درخواستوں پر فیصلہ سناتے ہوئے سپرنٹنڈنٹ اڈیالہ جیل کو ہدایت کی کہ عمران خان اور بشریٰ بی بی کو قیدِ تنہائی میں نہ رکھا جائے اور جیل قوانین کے مطابق انہیں تمام سہولیات فراہم کی جائیں۔

عمران خان کی جانب سے ان کی بہن علیمہ خان جبکہ بشریٰ بی بی کی جانب سے مبشرہ خاور مانیکا نے مبینہ قیدِ تنہائی کے خلاف عدالت سے رجوع کیا تھا۔

عدالتی فیصلے میں اڈیالہ جیل کے حکام کو بشریٰ بی بی سے عمران خان کی ملاقات کرانے کی بھی ہدایت کی گئی ہے۔ عدالت نے قرار دیا کہ بانی پی ٹی آئی کو جیل قوانین کے مطابق اہلِ خانہ سے ملاقات کی سہولت فراہم کی جائے۔

فیصلے میں عمران خان کے بیٹوں سے ٹیلی فونک گفتگو کرانے کی ہدایت بھی کی گئی ہے۔ عدالت نے جیل حکام کو ہدایت کی کہ بانی پی ٹی آئی کو روزانہ کی بنیاد پر اخبارات اور کتابیں فراہم کی جائیں۔

اسلام آباد ہائیکورٹ نے عمران خان کو جیل رولز کے مطابق طبی سہولیات فراہم کرنے کی بھی ہدایت کی۔ عدالت نے آڈیو ریکارڈنگ سے متعلق قرار دیا کہ اگر اس سہولت کا غلط استعمال ہوتا ہے تو اسے واپس لیا جا سکتا ہے۔

عدالت نے نصرت بھٹو کیس اور بیگم شمیم آفریدی کیس کے فیصلوں کی روشنی میں درخواستوں کو قابلِ سماعت قرار دیتے ہوئے سپرنٹنڈنٹ اڈیالہ جیل کو عدالتی ہدایات پر عملدرآمد یقینی بنانے کا حکم دیا۔

اسلام آباد ہائیکورٹ نے جیل حکام کو 15 روز کے اندر عملدرآمد رپورٹ عدالت میں جمع کرانے کی بھی ہدایت کی ہے۔