عمران خان کی ہسپتال منتقلی کا حکم، اسلام آباد انتظامیہ نے نظرثانی اپیل کی جلد سماعت کی درخواست دائر کر دی

اسلام آباد انتظامیہ نے بانی پی ٹی آئی عمران خان سے متعلق سپریم کورٹ کے 18 اگست کے حکم کے خلاف نظرثانی درخواست کی جلد سماعت کے لیے عدالت عظمیٰ سے رجوع کر لیا۔

چیف کمشنر اسلام آباد کی جانب سے دائر درخواست میں سپریم کورٹ کے 18 اگست کے عدالتی حکم پر نظرثانی، اس میں ترمیم اور اسے واپس لینے کی استدعا کی گئی ہے۔

نظرثانی درخواست میں بانی پی ٹی آئی عمران خان کو اڈیالہ جیل سے نجی ہسپتال منتقل کرنے اور میڈیکل پینل کے ذریعے ان کے طبی معائنے اور علاج سے متعلق عدالتی احکامات کو چیلنج کیا گیا ہے۔

درخواست گزار نے مؤقف اختیار کیا ہے کہ معاملہ محض طبی سہولیات تک محدود نہیں بلکہ متعلقہ قانونی اور آئینی دائرہ اختیار سے بھی جڑا ہوا ہے۔ درخواست میں آئین کی 27ویں ترمیم کے بعد عدالتی دائرہ اختیار، آرٹیکل 175(2) اور جیل قوانین سے متعلق اہم قانونی سوالات بھی اٹھائے گئے ہیں۔

اسلام آباد انتظامیہ کے مطابق سپریم کورٹ کا 18 اگست کا حکم وقت کی پابندی سے متعلق ہے، اس لیے نظرثانی درخواست پر فوری سماعت ضروری ہے تاکہ معاملے کا بروقت فیصلہ کیا جا سکے۔

درخواست میں چیف کمشنر اسلام آباد نے سپریم کورٹ سے استدعا کی ہے کہ نظرثانی درخواست کو جلد از جلد سماعت کے لیے مقرر کیا جائے۔