بھارتی پنجاب کے وزیراعلیٰ بھگونت مان کو لاہور میں عالمی پنجابی کانفرنس میں شرکت کی دعوت

بھارتی میڈیا کے مطابق وزیراعلیٰ بھگونت سنگھ مان نے جمعے کو پنجاب اسمبلی کے اجلاس کے دوران بتایا کہ انہیں لاہور میں منعقد ہونے والی عالمی پنجابی کانفرنس میں شرکت کی دعوت موصول ہوئی ہے۔ کانفرنس کے منتظمین نے انہیں دورے کی دعوت دینے کے ساتھ میزبانی کی پیشکش بھی کی ہے۔

بھگونت مان نے اپنے مخصوص مزاحیہ اور طنزیہ انداز میں کہا کہ جب بھارتی حکومت انہیں فرانس اور جاپان جیسے ممالک کے دوروں کی اجازت نہیں دیتی تو پاکستان جانے کی اجازت کیسے دے گی؟

بھارتی پنجاب کے وزیراعلیٰ نے کہا کہ ہمارا کلچر ایک ہے اور ہمارے شاعر سمیت دیگر لوگ لاہور جائیں گے، اس لیے وہ بھی اس کانفرنس میں شرکت کے خواہش مند ہیں۔

اس موقع پر بھارتی پنجاب اسمبلی کے اسپیکر نے بھگونت مان سے کہا کہ اگر انہیں پاکستان جانے کی اجازت مل جائے تو وہ انہیں بھی اپنے ساتھ لے جائیں۔

اس پر وزیراعلیٰ بھگونت مان نے کہا کہ وہ چاہتے ہیں کہ سب مل کر کرتار پور جائیں۔

لاہور میں عالمی پنجابی کانفرنس کے انعقاد اور بھارتی پنجاب کے وزیراعلیٰ کو دعوت دیے جانے کو دونوں جانب کے مشترکہ ثقافتی ورثے کے تناظر میں اہم پیش رفت قرار دیا جا رہا ہے۔ تاہم بھگونت مان کی شرکت کا انحصار بھارتی حکومت کی اجازت پر ہوگا۔