یاسر حسین سے 11 سال عمر کے فرق پر اقرا عزیز نے دل کی بات بتادی

کراچی: معروف اداکارہ اقرا عزیز نے شوہر اور اداکار یاسر حسین کے ساتھ عمر کے 11 سال کے فرق پر ہونے والی تنقید کا جواب دیتے ہوئے کہا ہے کہ ان کے نزدیک عمر کا فرق کوئی غیر معمولی بات نہیں۔

ڈراما انڈسٹری کی مقبول جوڑی اقرا عزیز اور یاسر حسین کی شادی 2019 میں ہوئی تھی۔ شادی کے بعد سے دونوں کے درمیان عمر کے فرق سے متعلق سوالات اور تبصرے مسلسل سامنے آتے رہے ہیں۔

اپنے ایک حالیہ انٹرویو میں اقرا عزیز نے عمر کے فرق پر ہونے والی تنقید کے بارے میں بات کرتے ہوئے کہا کہ وہ یاسر حسین جیسے شوہر کا ساتھ ملنے پر خود کو خوش قسمت سمجھتی ہیں۔

اداکارہ کا کہنا تھا کہ مختلف لوگ ان کی شادی کے بارے میں اپنی اپنی رائے رکھتے ہیں، تاہم دوسروں کی باتوں نے کبھی بھی شوہر کے لیے ان کے اپنے احساسات کو تبدیل نہیں کیا۔

یاسر حسین سے تقریباً 11 سال عمر کے فرق کے حوالے سے سوال پر اقرا عزیز نے کہا کہ ان کے خیال میں یہ فرق بالکل معمول کی بات ہے، کیونکہ ان کے والدین کے درمیان بھی عمر کا ایسا ہی فرق رہا ہے۔

اقرا عزیز نے مزید کہا کہ کسی بھی رشتے میں صرف عمر کا فرق اہمیت نہیں رکھتا، بلکہ اصل چیز یہ ہے کہ انسان اپنے شریکِ حیات کے ساتھ کتنی وابستگی، ذہنی ہم آہنگی اور سکون محسوس کرتا ہے۔

انہوں نے واضح کیا کہ عمر میں فرق ہو یا نہ ہو، رشتے کی کامیابی کا انحصار اس بات پر ہوتا ہے کہ دونوں افراد ایک دوسرے کے ساتھ کس قدر آرام دہ اور مطمئن محسوس کرتے ہیں۔

واضح رہے کہ اقرا عزیز اور یاسر حسین دو بچوں کے والدین ہیں۔ ان کے پہلے بیٹے کبیر حسین کی پیدائش جولائی 2021 میں ہوئی، جبکہ جنوری 2026 میں ان کے ہاں بیٹی صوفیہ حسین کی پیدائش ہوئی۔