ایران کا ایک ہی روز 2 امریکی MQ-9 ڈرون مار گرانے کا دعویٰ، روسی میڈیا کے بھی اہم دعوے

تہران: ایرانی پاسداران انقلاب نے دعویٰ کیا ہے کہ ایران نے ایک ہی دن میں دو امریکی MQ-9 ریپر ڈرون مار گرائے ہیں، جبکہ روسی میڈیا نے دعویٰ کیا ہے کہ تہران نے امریکی میزائل دفاعی نظام کا مؤثر توڑ بھی نکال لیا ہے۔

ایرانی فوج کے ترجمان کے مطابق ایک امریکی ڈرون جنوبی صوبہ بوشہر جبکہ دوسرا اہواز کے قریب ایرانی فضائی دفاعی نظام کے ذریعے مار گرایا گیا۔ ترجمان کا کہنا تھا کہ آج گرائے جانے والے امریکی ڈرونز کی تعداد دو ہوگئی ہے۔

ایرانی حکام کے مطابق اس سے ایک روز قبل، جمعرات کو بھی ایرانی پاسداران انقلاب نے ملکی فضائی حدود میں داخل ہونے والے ایک امریکی ڈرون کو تباہ کرنے کا دعویٰ کیا تھا۔

دوسری جانب روسی میڈیا کی رپورٹس میں دعویٰ کیا گیا ہے کہ ایران نے امریکی میزائل دفاعی نظام کا مؤثر توڑ دریافت کر لیا ہے۔ رپورٹ کے مطابق ایران نے حالیہ کارروائیوں میں امریکی اہداف کو انتہائی درستگی سے نشانہ بنایا۔

روسی میڈیا کے مطابق ایران کے جدید میزائل نہایت تیز رفتاری سے اپنے ہدف کی جانب بڑھتے ہیں اور دورانِ پرواز اپنی سمت اور پوزیشن تبدیل کرنے کی صلاحیت رکھتے ہیں، جس سے انہیں روکنا مزید مشکل ہو جاتا ہے۔

رپورٹس میں یہ بھی دعویٰ کیا گیا ہے کہ پینٹاگون اس بات پر تشویش کا شکار ہے کہ ایران حساس فوجی اہداف کو غیر معمولی درستگی سے کس طرح نشانہ بنا رہا ہے۔

ادھر وال اسٹریٹ جرنل نے دعویٰ کیا ہے کہ روس نے ایران کو محدود پیمانے پر حساس انٹیلی جنس معلومات فراہم کی ہیں۔ امریکی اخبار کے مطابق ایک سابق روسی انٹیلی جنس افسر نے بتایا کہ ان معلومات میں امریکی بحری جہازوں اور فوجی طیاروں کی ممکنہ پوزیشنز بھی شامل ہوتی ہیں۔

تاہم ان دعوؤں پر امریکی حکام کی جانب سے تاحال کوئی باضابطہ ردعمل سامنے نہیں آیا، جبکہ ان اطلاعات کی آزاد ذرائع سے تصدیق بھی نہیں ہو سکی۔