ایران نے ہرمزگان اور بندر خمیر حملوں میں جاں بحق افراد کی تصاویر جاری کر دیں

ایران نے ہرمزگان صوبے اور بندر خمیر میں امریکی حملوں کے نتیجے میں جاں بحق ہونے والے شہریوں کی تصاویر جاری کرتے ہوئے حملوں کی شدید مذمت کی ہے۔

ایرانی وزیر خارجہ نے بندر خمیر میں حملے میں جاں بحق ہونے والے تین شہریوں کی تصاویر شیئر کرتے ہوئے دعویٰ کیا کہ یہ افراد اس وقت بندر خمیر پل سے گزر رہے تھے جب انہیں نشانہ بنایا گیا۔

وزیر خارجہ نے اپنے بیان میں کہا کہ ان حملوں میں جاں بحق ہونے والوں کا خون رائیگاں نہیں جانے دیا جائے گا۔ انہوں نے کہا کہ ایران جنوب سے شمال اور مشرق سے مغرب تک اپنے تمام علاقوں کا دفاع کرے گا اور ملک کی خودمختاری کے تحفظ کے لیے ہر ممکن اقدام کیا جائے گا۔

دوسری جانب ایرانی وزارت خارجہ کے ترجمان اسماعیل بقائی نے ہرمزگان صوبے میں امریکی حملوں میں جاں بحق ہونے والے آٹھ شہریوں کی تصاویر جاری کیں۔ ان کے مطابق جاں بحق افراد میں چار خواتین، دو معذور بھائیوں سمیت مجموعی طور پر چار مرد شامل ہیں۔

ترجمان وزارت خارجہ نے الزام عائد کیا کہ امریکا نے گزشتہ شب ہرمزگان میں اپنے حملوں کے دوران پلوں کو نشانہ بنا کر بین الاقوامی قوانین کی خلاف ورزی کی اور آٹھ بے گناہ شہریوں کی جان لی۔

اسماعیل بقائی نے مزید کہا کہ ان حملوں کے بعد ایرانی عوام پہلے سے زیادہ متحد اور پرعزم ہیں اور اپنے ملک کے خلاف ہونے والی اس کارروائی کا بھرپور جواب دینے کے لیے تیار ہیں۔

نوٹ: اس خبر میں امریکی حملوں سے متعلق دعوے ایرانی حکام کے بیانات پر مبنی ہیں، جن کی آزاد ذرائع سے فوری طور پر تصدیق نہیں ہو سکی ہے۔