ایران کو امریکی جہازوں پر حملوں کی بھاری قیمت چکانا ہوگی، مارکو روبیو

امریکی وزیر خارجہ مارکو روبیو نے ایران کو خبردار کیا ہے کہ اگر ایرانی فورسز نے امریکی بحری جہازوں کو نشانہ بنایا تو ایران کو اپنے تیل بردار بحری جہازوں سے ہاتھ دھونا پڑے گا۔

کولمبیا میں صحافیوں سے گفتگو کرتے ہوئے مارکو روبیو نے کہا کہ امریکی جنگی جہازوں پر حملے کی کوششوں کے جواب میں امریکا ایرانی آئل ٹینکرز کو نشانہ بناتا رہے گا۔

مارکو روبیو کا کہنا تھا کہ ایران کو امریکی بحری جہازوں کو نشانہ بنانے کی صورت میں اپنے تیل بردار جہازوں کے نقصان کے لیے تیار رہنا ہوگا۔

یہ بیان ایسے وقت میں سامنے آیا ہے جب ایران اور امریکا کے درمیان کشیدگی میں مسلسل اضافہ ہو رہا ہے۔ اس سے قبل امریکی سینٹرل کمانڈ نے دعویٰ کیا تھا کہ امریکی فورسز نے پانچ ایرانی خام تیل بردار بحری جہاز تباہ کیے ہیں۔

امریکی دعوے کے مطابق یہ کارروائی ایرانی پاسدارانِ انقلاب کی جانب سے امریکی بحری جنگی جہاز کو بیلسٹک میزائلوں سے نشانہ بنانے کی کوششوں کے بعد کی گئی۔

تازہ بیانات کے بعد خلیج اور خطے میں بحری کشیدگی مزید بڑھنے کے خدشات پیدا ہوگئے ہیں، جبکہ عالمی سطح پر تیل کی ترسیل اور سمندری تجارت پر بھی ممکنہ اثرات کے حوالے سے تشویش بڑھ رہی ہے۔