وزیراعظم شہباز شریف اور فیلڈ مارشل عاصم منیر کی ایرانی وفد سے اہم ملاقات، باضابطہ مذاکرات سے قبل مشاورت

(برگن سٹاک) وزیراعظم پاکستان شہباز شریف اور فیلڈ مارشل سید عاصم منیر نے ایرانی اعلیٰ سطحی وفد سے اہم ملاقات کی، جس میں دونوں ممالک کے درمیان باہمی دلچسپی کے امور اور علاقائی صورتحال پر تبادلہ خیال کیا گیا۔

ذرائع کے مطابق یہ ملاقات ایران اور امریکہ کے درمیان جاری سفارتی عمل کے تناظر میں باضابطہ مذاکرات کے آغاز سے قبل ہوئی، جس کا مقصد اہم معاملات پر ابتدائی مشاورت اور مؤقف کا تبادلہ تھا۔ وفاقی وزیر داخلہ محسن نقوی بھی پاکستانی وفد کا حصہ تھے اور ملاقات میں شریک رہے۔

ایرانی وفد کی نمائندگی وزیر خارجہ عباس عراقچی اور ایرانی پارلیمنٹ کے سپیکر محمد باقر قالیباف نے کی۔ ملاقات کے دوران دوطرفہ تعلقات، علاقائی استحکام اور امن کے فروغ سے متعلق مختلف پہلوؤں پر گفتگو کی گئی۔

اس سے قبل وزیراعظم شہباز شریف اور فیلڈ مارشل سید عاصم منیر امریکی وفد سے بھی ملاقات کر چکے ہیں، جس میں خطے کی صورتحال، سفارتی پیش رفت اور جاری مذاکراتی عمل پر تبادلہ خیال کیا گیا تھا۔

سفارتی ذرائع کے مطابق برگن سٹاک میں ہونے والے یہ رابطے ایران، امریکہ، پاکستان اور دیگر شراکت دار ممالک کے درمیان جاری سفارتی کوششوں کا حصہ ہیں، جن کا مقصد خطے میں کشیدگی میں کمی اور پائیدار امن کے امکانات کو مضبوط بنانا ہے۔

مبصرین کے مطابق پاکستانی قیادت کی ایرانی اور امریکی وفود سے الگ الگ ملاقاتیں اس بات کا اشارہ ہیں کہ پاکستان مذاکراتی عمل میں فعال سفارتی کردار ادا کر رہا ہے اور خطے میں استحکام کے لیے اپنی کوششیں جاری رکھے ہوئے ہے۔