ایران کو امریکا کی نئی تجاویز موصول، جوہری معاملے پر توجہ؛ تہران کا آبنائے ہرمز پر مذاکرات پر زور

تہران: ایرانی وزارت خارجہ کے ترجمان اسماعیل بقائی نے امریکا کی جانب سے نئی تجاویز موصول ہونے کی تصدیق کردی ہے، تاہم ان کا کہنا ہے کہ نئی امریکی تجویز سابقہ تجاویز سے ملتی جلتی ہے اور اس میں بنیادی توجہ ایران کے جوہری معاملے پر مرکوز ہے۔

پریس بریفنگ کے دوران اسماعیل بقائی نے کہا کہ تہران چاہتا ہے کہ مذاکرات میں آبنائے ہرمز کے معاملے کو بھی مرکزی اہمیت دی جائے۔ ان کے مطابق ایران امریکی تجویز کا جواب پہلے ہی دے چکا ہے، تاہم امریکا کو بعض اضافی نکات سے آگاہ کرنا ابھی باقی ہے۔

ایرانی وزارت خارجہ کے ترجمان نے کہا کہ مذاکرات کے معاملے کی نگرانی وزیر خارجہ سمیت چھ رکنی کمیٹی کر رہی ہے۔

اسماعیل بقائی نے علاقائی ممالک کو امریکا اور اسرائیل کا ساتھ دینے سے گریز کرنے کا مشورہ دیتے ہوئے کہا کہ آئندہ ایران کے خلاف جہاں سے بھی جارحیت کی جائے گی، اس کا ردعمل پہلے سے مختلف ہوگا۔

انہوں نے واضح کیا کہ ایران اپنے قومی مفادات اور سکیورٹی صورتحال کو مدنظر رکھتے ہوئے مذاکرات اور سفارتی معاملات پر فیصلے کر رہا ہے۔

ایرانی حکام کی جانب سے نئی امریکی تجاویز کی تصدیق ایسے وقت میں سامنے آئی ہے جب تہران اور واشنگٹن کے درمیان جوہری معاملے کے ساتھ ساتھ آبنائے ہرمز کی صورتحال بھی مذاکراتی عمل میں اہم موضوع بنی ہوئی ہے۔